SHC inthlan hmasa ber neih a ni dawn ta
Sinlung Hill Council (SHC) inthlanpui hmasa ber chu vawiin hian neih a ni dawn ta a, zing dar 7 aṭanga tlai dar 4 inkarah vote thlak a ni dawn.
Ruahman dan chuan, SHC inthlanah hian vote thlak zawh veleh ballot box-te chu council bial tina counting hall pakhat zel siamah lak khawm a, vote chhiar nghal tur a ni a, vote chhiar zawh veleh inthlan result pawh chhiar nghal tur a ni.
SHC inthlan turah hian council bial 12 awmin, polling station 38 a awm a, candidate 42 an awm. Polling station 38 zinga 31 chu Aizawl district chhunga mi a ni a, polling station pasarih chu Kolasib district chhunga mi a ni thung. Bial 12 aṭanga thlan tlin mi 12-te bakah, sorkar aiawh member pahnih ruat leh tur a ni a, an vaiin member 14 an ni ang.
SHC bial 12-te chu MNF leh HPC ṭang dunin an chuh kim a, MNF-in bial pasarihah candidate siamin, HPC-in bial pangaah candidate an dah thung. Indian National Congress (INC) chuan bial parukah candidate an dah a, bial ṭhenkhatah independent candidate an thláwp. ZPM pawhin independent candidate ṭhenkhat an thláwp bawk.
Election Commission of India (ECI)-in a pawm political party ang chuan, MNF-in candidate pasarih, Congress-in candidate paruk, BJP leh National People's Party (NPP)-in candidate pahnih ve ve, HPC-in candidate pakhat an nei a; independent candidate 24 awmin, candidate zawng zawng chu 42 an ni.
SHC huam chhungah tun ṭum inthlanah hian voter 20,914 an awm a, mipa 10,509 leh hmeichhia 10,405 an ni a, hmeichhia aiin mipa 104-in an tam zawk. Voter zawng zawng chu electoral photo identity card (EPIC) pek vek an nih tawh avangin, vote thlak turte chu EPIC keng tura tih an ni a; EPIC nei lo palh an awm a, vote nei an nih chuan, an nihna tichiang turin - ration card, driving license, PAN card, Aadhaar card, birth certificate leh bank passbook zinga a eng emaw ber ken tur a ni.
Kum 2018-a Mizoram sorkar leh HPC(D) ten inremna thuthlung an ziah hnuah SHC din a ni a, sorkar lailawk (interim) siam a ni. Sorkar lailawk, thla ruk atana tih chu a tawp hnuah thla li chhung atan pawh sei a ni a, chu pawh chu November 8, 2019 hian a tàwp dawn a ni.