DMR fund hmuh danah NE state-te kan ṭanrual a ngai - Prof. Lalnilawma

Nimin khan hmarchhak state-te tana sorkar laipuiin 16th Finance Commission hnuaia khuarel chhiatna kaihhnawiha sum a pek chungchang sawiho a ni a; Disaster Management & Rehabilitation (DMR) minister Prof. Lalnilawma pawh a pisa aṭangin video conferencing kaltlanga telin, DMR fund hmuh danah hmarchhak state-te ṭanrual a ngaih thu a sawi.

Prof. Lalnilawma chuan, hmarchhak state-te'n khuarel chhiatna avangin harsatna hrang hrang kan tawrh nasa ṭhin thu a sawi a, "Harsatnate sutkian nan leh DMR lamah tun aia ṭha leh rang zawka hma kan lak zel theih nan 16th Finance Commission kaltlanga DMR fund hmuh danah hmarchhak state-te kan ṭanrual a, sorkar laipui nen thukhat vuaa hma kan lak zel a pawimawh," a ti.

Tun hnaia Chief Minister hoa State Disaster Management Authority ṭhutkhawmah 16th Finance Commission kaltlanga khuarel chhiatna chungchanga DMR department-in sum a dawn tur tarlan a ni tawh a; hmarchhak state dangte beráwnin, a huhoa hmalak dan kawng zawn ni se, tih a ni.

State tinte'n DMR fund an chan tur 16th Finance Commission-in a chhût dan tehfung a hman chu hmarchhak state-te’n khuarel chhiatna an tawh ṭhin ang te, ram mil leh mamawh dan mila chhut a ni lo anga hriatna leh an chan tur leh hmuh tur ang fund an hmu pha loa hriatna a awm a ni. Hmarchhak state-te’n a huhoa sorkar laipuiah thlen ni se tih a nih avangin nimin khan ṭhutkhawm buatsaih a ni.

Sawihonaah hian state tinte'n mahni dinhmun lo zir se, an hmalak zel dan tur ngaihtuah ni se, remchang hmasa berah Guwahati-ah sawiho leh ni se, an ti.