KHAWTHLIR

GAC-in thisen pe

Aizawl College NSS chuan nimin khan an hmunah thisen pek an huaihawt a, Civil Hospital, Aizawl Blood Centre tan thisen unit 104 an pe a, petute mipa 90 leh hmeichhia 14 an ni.

Mizoram House-a thlen dil hun siam

General Administration department chuan, Mizoram House-a thlen diltute'n an thlen hma ní tlai dar 4:30 aia tlai loah dilna thehluh zel tur a nih thu an tarlang a, "Hun bithliah hnu lama room dilna thehluh chu a tûka room booking atan ngaihtuah a ni tawh lo ang," an ti. Hemi chungchangah hian GAD chuan July 17, 2026 khan office memorandum an tichhuak a, an thuchhuak hi hman ṭan nghal a ni.

NITI Aayog hotu nen inkâwm

Mizoram State Planning Board vice chairman Dr Kenneth Chawngliana chuan nimin khan Delhi-ah NITI Aayog member Rajiv Gauba a hmu a; tourism, Ginger Mission leh Vision 2047 chungchang leh, Mizoram hmasawnna tura thawhhona tihchak dan tur a sawipui. Dr Kenneth Chawngliana chuan, Mizoram chu Vision 2047 buatsaih hun aṭangin a taka thawh hunah a luh tawh thu sawiin, Mizoram hmachhawp hrang hrang a sawi a; Mizoramah khualzin an pun nasat avangin Aizawlah Mizoram Tourism Conclave buatsaih turin NITI Aayog a ngen a ni.

Pisa hun vawng dik turin hriattir

Lunglei DC Navneet Mann chuan nimin zing dar 9:00 khan sawi lâwk loin Bawrhsap pisaa pindan hrang hrang a tlawh a, thawktute hun vawn dik dan leh pisa inkaihhruaina zawm dan a endik. Bawrhsap hian nimin khan thupek a chhuah nghal a; thawktu zawng zawngte chu pisa kai ṭan hun zing dar 9-ah pisa thlen vek tur a nih thu leh, bàn hun tlai dar 5 thleng pisaa awm tur a nih thu te, pisa hun chhungin duty ṭulah lo chuan pisa chhuahsan loh tur a nih thu leh, loh theih lohna vanga chhuah a ngaih chuan phalna lak hmasak tur a nih thu a tarlang.

BLO/ABLO training

Nimin khan Serchhip DC Meeting Hall-ah SIR 2026 hmalakna kal meka Serchhip constituency chhunga BLO leh ABLO-te tan SIR 2026 draft electoral roll-a hmalak zui zel dan tur inzirtirna buatsaih a ni. Training hi vawiinah Tuikum leh Hrangturzo constituency chhunga BLO leh ABLO te tan buatsaih leh a ni ang.

Bill pek remti

Saitual City Level Executive Committee chu an chairman Srinivas Sadi, bawrhsap kaihhruaiin nimin khan an ṭhukhawm. Shelter for Urban Homeless kaltlanga February 6, 2026-a sak ṭan Patient Attendants’ Shelter sak mek atana pawisa (first & second installment) pek chhuah chungchang sawiho a ni a, bill 5% leh 40% pek an remti.