Vawiinah PS Shreedharan Pillai Governor atan lak luh a ni dawn

Mizoram Governor 20-na atan vawiin chawhma dar 11:30 hian PS Shreedharan Pillai chu rinawmna thu tiamtira lak luh a ni dawn. Ani hma hian Mizoramin lieutenant governor panga leh governor 19 a nei tawh.

PS Shreedharan Pillai hian nimin tlai khan Mizoram a rawn thleng a, Lengpui Airport-ah chief minister Zoramthanga, Home minister Lalchamliana, chief secre­tary Lalnunmawia Chuaungo leh sorkar hotu dangte'n an lo hmuak a ni. Airport kawtah PS Shreedharan Pillai hi Mizoram police-in guard of honour an lo hlan.

Mizoram hian union territory a nih chhungin lieutenant governor panga a nei a, state a nih hnuah governor 19 a nei tawh. Mizoramin governor a neih tam ber kum chu kum 1998 kha a ni a, governor ni lai PR Kyndiah chu January 13, 1998-ah a chhuak a, hemi kum vêk hian governor dang pathum lak luh leh a ni.

Mizoramin lieutenant governor a neih hmasak ber chu SP Mukherjee a ni a, April 24, 1972-ah lak luh a ni. Governor hmasa ber chu Hiteswar Saikia a ni thung a, Mizoram State Day, February 20, 1987-ah lak luh a ni.