Larsapin MRB Annual Report a tlangzarh

Governor Gen. Dr Vikay Kumar Singh chuan nimin khan Lok Bhavan-ah sum kum liam ta 2025-26 chhunga Mizoram Rural Bank (MRB) hmalakna hrang hrang tarlanna, 43rd Annual Report a tlangzarh. MRB hian kum 2025-26 chhungin hlêp cheng vbc 152.27 an nei a ni.

Larsap chuan, MRB-in kum dang zawng aia hmaa Annual Report an peih leh, hmasawnna hmuh theiha a awm chu lawmawm a tih thu a sawi a, "Mizoram thingtlang kil tin dâp chhuaka awm MRB hi thingtlang sum leh pai dinhmun innghahna pawimawh a ni," tiin, mipui tana duan central scheme hrang hrang tihhlawhtlinna leh education loan pekah theihtawp chhuah turin a fuih.

Mizoram chu chhiah luh tlemna (revenue deficit state) a nih avangin chhiah lakah ṭan lak a ṭul thu sawiin Gen. VK Singh chuan, "Thingtlang sum leh pai dinhmun tihhmasawn a pawimawh. Loneitute thar chhuah hlâwk zawka hralh a, sum lak luh tipung turin market linkage ṭha ruahman a ṭul a, inzirtir tam a ngai," a ti a; CD ratio ṭha an neih leh NPA awm lo siam tura ṭan la zel turin MRB hotute a chah.

Tlangzarh inkhawm hi MRB RSETI director C Laldampuia'n a kaihruai a; Network-I general manager Saibal Kanti Roy leh MRB chairman Sheryl L Vanchhong te pawhin thu an sawi.

Tarlan danin, MRB hi scheduled bank niin, Mizorama bank inzar pharh zau ber a ni a; district tinah inbunin, branch 106 leh thawktu 491 an nei. Branch an neih lohna hmunah business correspondent (BC) 350 chuang leh Kolasib-ah MRB RSETI an nei bawk.