Aizawl District Sports Festival hawng

Minister Lalthansanga chuan nimin khan Lammualah Aizawl District Sports Committee (ADSC) buatsaih 'Viksit Bharat Aizawl District Sports Festival 2026' a hawng. Sports festival hi infiamna chi 16 hmangin Aizawla hmun hrang hrangah July 30, 2026 thleng neih tura ruahman a ni.

Lalthansanga chuan, kum 2047-ah India chu ram changkang leh intodelh nihtir tuma hmalak mek a nih thu sawiin, "Hmasawna chu hmalakna pakhat chauhin a thlentir thei lo a, hmalakna hrang hrang rah chhuah a ni ṭhin a, infiamna pawhin hmun pawimawh tak a chang. Infiamna chuan ram hmasawnna atana thil pawimawh - inlungrualna, hriselna, mahni invawn, chona leh inelna thianghlim te chu mimal leh khawtlang nunah seng luh an nih theih nan hmun pawimawh tak a chang a ni," a ti.

Sports Festival hawnna inkhawm hi Aizawl bawrhsap Lalhriatpuia, ADSC chairman ni bawkin a kaihruai. Festival chhungin Aizawla hmun hrang hrangah chess, weightlifting, teakwondo, football, wrestling, judo, wushu, rifle shooting, table tennis, hockey, karate, athletics, volleyball, badminton, boxing leh tennis hmangtein inelna buatsaih a ni ang.