KHAWTHLIR

PWD chuan nimin aṭang khan Vaivakawn-Hunthar kawng péngṭhuam aṭanga Chanmari West kâwipui inkar kawng blacktop hna an thawk a, hei vang hian Coordination Committee on Management for Aizawl City thutlukna angin, nimin aṭanga November 13 thleng, chawhma dar 10:30 leh tlai dar 3:30 inkarah kawngpui khâr a ni ṭhin dawn. Hemi chungchangah hian Traffic SP Rodingliana Chawngthu-in thupek a chhuah a, thupek chuan chhiatrupna thil, kângmei leh rîkrum kaihhnawiha duty leh dan leh thupek pawimawha duty-te a huam lo thung.

Tourism minister Robert Romawia Royte hoin nimin khan a pisaah kumina Winter Festival hman dan tur rèl a ni a, Winter Festival neih hun atan December 18, 2019 pawmin, a hmun atan Lammual an thlang. Winter Festival hman dan tur kimchang ngaihtuah turin Tourism Director kaihhruai Working Committee din tura rêl a ni bawk.

MPC party chuan thu­chhuah siamin, vawiina Sinlung Hills Council inthlanpui neih turah, boruak muanawm leh felfai taka hlen chhuah a nih ngei theih nan uluk taka dan leh thupek kengkawh turin Mizoram sorkar an ngen. MPC chuan, Mizoramin Governor thar PS Sreedharan Pillai a nei tur chu lawmawm an tih thu leh, North Eastern Students' Organisation-in Citizenship Amendment Bill dodalna India hmarchhak state tin khawpuia neih an tum chu an thlàwp thu an sawi bawk.

MHIP, Lengpui Model Branch chuan nimin khan an khaw primary school-ah an din champha vawi thumna an lawm. He hunah hian 'Hmeichhiate mawhphurhna' tih thupui an zirho bakah, intihhlimna chi hrang hrang leh léngkhawm zaia intihsiakte an buatsaih a ni.

Horticulture Board vice chairman Prof. F Lalnunmawia chuan nimin aṭang khan Secretariat Annex II-a a pisa a luah thar. Prof. F Lalnunmawia chuan thlai chi hrang hrang chin belh turin central-ah project thehluh a ni tawh a, "Kan project hi central lam pawhin an pawm ngei kan beisei. Thlai leh theia Mizoram a intodelh ngei theih nan a theihna zawng zawnga hmalak kan tum," a ti.