MLA-in IAS nih tum ṭanpuina a hlân

Serlui bialtu MLA Lalrinsanga Ralte, Rubber & Allied Crops Board vice chairman ni bawk chuan a bial chhung mi, IAS nih tum, sum leh pai lama harsa hnenah a inzir zelna tura senso atan nimin khan a pisaah pawisa a hlan.

MLA Lalrinsanga Ralte-in IAS nih tuma inzir zel tur ṭanpui­na a pek chu Lalduhawma, Buhchangphai a ni a, Lal­duhawma ni hnenah pawisa cheque a hlân. Lalduhawma hi HSSLC 2019-ah khan Science stream-ah Mizoram pumah pahnihna a ni a, lehkha thiam thei leh tumruh tak, IAS nih tum a ni. 

Mizoramah college kal a, inhlawh chawpa lehkha zir a, a intuak ngah hnua Delhi pan tum a ni a, mi ṭhahnemngaite'n MLA hnenah a chanchin an sawipui a ni. Lalrinsanga Ralte chuan a inzirna atan a term chhungin kum tin Rs. 1,00,000 a pe ṭhin dawn a, coaching class a kal hunah Rs. 1,00,000 bâk pawh pek belh a tum. Lalduhawma hian St. Stephen College, Delhi-a B.Sc. first semester a zir mek a ni.

Lalrinsanga Ralte chuan central service-a Mizo a tam thei ang an awm chu ram leh hnam humhalhna kawng khat nia a hriat thu sawiin, "Lalduhawma pawh hi tumruhna nen a kal ang a, ram leh hnam tana mi ṭangkai tak a ni ngei ang," a ti.

Mizoramin All India Service-a Mizoram-in cadre hran kan neih theihna atan chief minister Zoramthanga'n hma a lak thu sawiin Lalrinsanga Ralte chuan, "Chief Minister kan neih tawhah a ni chiah hi hetiang hmalakna nei awm chhun niin ka hria," a ti a, cadre hran kan neih chuan Mizo ṭhalaite pawh an phur sawt a rin thu a sawi.

Thusawitu dang, Central YMA vice president Lalhmachhuana chuan, "Central service kan nei tlem tawlh tawlh a, min chîm rengtu Chakma-te chuan ṭan la a, a thluak ṭha deuhte chu an in sponsor ṭhin a ni. Heng mite hian ro min rel sak hun a awm ang tih a hlauhawm. Pu Lalrinsanga thil tih hi mimal, pawl leh sorkar béng harhtu ni se a duhawm hle.