8th Schedule-a Mizo ṭawng dah vanga tribal nihna bo tura sawi hi a dik lo - CM

Chief minister Lalduhoma chuan, Indian Constitution 8th Schedule-a Mizo ṭawng telh a nih theih nan hma an lak mek thu leh 8th Schedule-a Mizo ṭawng dah vanga tribal nihna a bo tur anga mi ṭhenkhatin an sawi chu a dik loh thu a sawi.

Chief Minister hian nimin khan BSI Hall-ah Prof. Laltluangliana Khiangte ziah lehkhabu te leh mi dangin Prof. Laltluangliana Khiangte chanchin an ziahte dah khawmna lehkhabu a tlangzarh a; "Mizo ṭawng hi a ṭhang chak a, 8th Schedule-a khung turin hma kan la. 8th Schedule-a Mizo ṭawng dah hian tribal kan nihna hi a bo dawn lo a, mithiam inti tak takte'n a bo dawn ti zawngin an sawi ṭhin. Mizo zingah thiam inti, hria inti, thiam tak tak si lo, hre tak tak si lo hian mipui min tibuai fo," a ti.

Tribal nihna chu ṭawnga innghat a nih loh thu sawiin CM chuan, "The Scheduled Tribe Order 1950-ah khan tu nge tribal tih a chuang a, tribal kan la ni reng. Kan ṭawng nen inkungkaihna a nei lo a, 8th Schedule-a lak luh a nih avangin tribal kan nihna a bo dawn lo. 8th Schedule-a Mizo ṭawng dah turin central-ah kan thehlut a, a bu ṭha deuh kan siam. 8th Schedule-ah hian min khung theih mai pawh kan beisei hnai viau," a ti a, an bawhzui zel dawn thu a sawi.

Lalduhoma chuan, internet-ah Mizo ṭawng dah tam a ṭul thu sawiin, "Mizo ṭawng thumal leh chumi tlukpui sap ṭawng leh Hindi kan neih tam chuan AI thiamna hmanga Mizo ṭawnga hna kan thawhnaah min ṭanpui a, hnam dangte'n Mizo ṭawng hi anmahni ṭawnga an lo lehlin zung zung theih nan a ṭanpui ṭhin," a ti a; kum 2022 aṭangin Google Translate-in Mizo ṭawng a seng luh thu leh, tunah chuan Google leh language based AI zawng zawngah Mizo ṭawng hman theih vek a nih tawh thu a sawi bawk.