CM hi a bilhah a tho lo - ZPM ṭhalai

ZPM ṭhalaite chuan thuchhuah siamin, chief minister Zoramthanga ṭawng duh dan leh chêt dan enin, ram siamṭhatna kawngah kal ngaihna hre lo leh a bilha tho loa an ngaih thu an tarlang.

November 1, 2019-a Chief Minister-in SEDP hnuaia board hrang hrang pisa a hawnnaah, 'Zirtirtu lâk vel leh transfer vela buainate hi economics hmasawnnain a chinfel theih' tia a sawi chu mak an tih thu ZPM ṭhalaite chuan an sawi a, "Kan Chief Minister hi ram siamṭhatna kawngah kal ngaihna hre lo leh a bilha tho loah kan ngai," an ti a; economic dinhmun a ṭhat hun zirlaite nghahpui tawp mai chu thil lungchhiatthlak tak a nih thu an sawi.

ZPM ṭhalai chuan, "Zirtirtu lâk leh tranfer chungchanga buainate hi ram a changkan huna fel mai tura ngaih chi a ni lo a, economic development a awm theih nana tuna tihfel theih leh tihfel ṭul tak a ni zawk," an ti. SSA leh RMSA hnuaia zirtirtu hna 91, advertisement chhuah loa lak chung­changa School Education Minister insawifiahna chu pawmawm loh tak a nih thu sawiin ZPM ṭhalaite chuan, "An pu ber thil thlîr dan aṭanga ngaihtuah chuan, mitdelin mitdel a hruai ang mai an ni. An demawm hran lo, a ngaihna a hre lo a ni," a ti a; Mizoram sorkar chu zirna kalphung siamṭhat tum tak tak loa an ngaih thu an sawi bawk.