Mizoram chhunga siam chhuah hmang uar turin sorkarin hriattir

Mizoram sorkar chuan sorkar pisa, zirna-in, board, corporation leh agency dangte chu Mizoram chhunga thil siam chhuahte hmang uar turin tun hnai khan a hriattir.

Finance department chuan 5th National Con-ference of Chief Secreta-ries-a Atmanirbhar Bha­rat leh Swadeshi chung­changa thutiamte bawhzui nan, state eco­nomy tihchakna tur leh mahni state thil siamte chawisanna atan state chhunga thil siam chhuah­te hmang uar turin office memorandum an tichhuak a ni.

Finance department tarlan danin, sorkar pisa, zirna in, board, corporation leh sorkar hnuaia agency-te chu programme, training leh an hmalakna hrang hrangah Mizorama thil siamte hmang uar tura tih an ni a; thlêng, no, tui, thingpui leh in tur dangte leh ei turah Mizorama siamte hmang uar turin a ti.

Pisa mamawh hrang hrangah Mizorama siamte ngaih pawimawh hmasak tur a ni a, chungte chuan ṭhutthleng, puanzar, lawmman leh thil dangte a huam. Hetihrual hian, mamawhte chu Mizorama a awm dan leh a ṭhat dan ngaihtuah hmasak phal a ni.

Mizoram Procurement Preference Policy for Micro and Small Enterprises, 2025-a Rule 8(b) nen a inmil tur a ni a; Rule hian kum khat chhunga thil lei zawng zawng aṭangin 25% tal chu Mizorama awm micro leh small enterprise aṭangin lei turin a phût.

Rule 8(e)-ah chuan state pawn lam aṭanga lei aiin Mizorama siamte lei hmasak zel tura tih a ni. Administrative head leh department head te chu thuchhuak hi zâwm ngei tura tih an ni a; zawm theih loh thilah chuan a chhan chiang taka tarlangin Chief Secretary hnenah dilna thehluh tur a ni bawk.

Finance department office memorandum hi Chief Minister remtihna lak a nih hnuah tihchhuah a ni.