KHAWTHLIR

Heroin man

Assam Rifles sipaite chuan July 21, Thawhlehni khan Champhai Zote huam chhungah mi pakhat hnen aṭangin heroin gram 24.23 an man a, Excise and Narcotics department hnenah an hlan. July 21 vêk khan Assam Rifles leh Police ten Khatlaah Lalhumhima (27), BSUP, Lawipua cheng nia insawi hnen aṭangin heroin gram 21.330 an man bawk.

NSUI-in thlâwp

Congress party zirlai pawl, National Student Union of India (Mizoram) chuan thuchhuah siamin, NEET leh exam dang eng emaw zata zawhna pûtru nasa tak avang leh, chumi kaihhnawiha India ram zirlaite'n lungawi lohna an lantir mek chu an thlâwp thu an tarlang. "Zirlaite'n an phût - Union Education minister Dharmendra Pradhan bàntir te, paper leak tuartu zirlaite hnena zangnadawmna cheng vbc 1 pek te, education system siamṭhat te hi kan thlâwp tlat a ni," an ti.

Kuhva phurh khap

Kolasib district magistrate H Dolianbuaia chuan thupek chhuahin, Kolasib district chhungah dan loa kuhva rah phurh luh leh paltlang phal a nih loh thu a puang. Magistrate chuan, Kolasib district chhungah ram pawn aṭanga lak luh kuhva dah khawlna kudam siam phal a nih loh thu tarlangin, "Kudam awm sate pawh Kolasib SP-in kalhin, thu leh awm hma chuan khawih chêt awih a ni lo," a ti. Thupek hian chhuah a nih aṭanga ni 60 a huam dawn a ni.

Civil Registration System sawiho

Siahaa Inter-Departmental Coordination Committee on Civil Registration System chu nimin khan DC conference hall-ah an ṭhukhawm a, district registrar of births & deaths VL Hruaizela Khiangte, bawrhsapin a kaihruai. India khua leh tui dik tak, finfiahna document neih loh vanga registration dil thei lote chu ngaihtuahna fim tak nen ruahmanna siamsak ni se, an ti a; kumtlinglo, nu leh pa nei tawh si lo, nu leh pa India khua leh tui dik tak ni site chu guardianship certificate hmangin registration dil theih dan tur ruahman ni se an ti bawk.