Lungleia ei tur siamnate endik a ni

Lunglei District Level Advisory Committee on Safe Food & Healthy Diets hnuaia Joint Inspection Team chuan tun hnai khan Lungleia ei leh in siamna hmun (food business operator) 20 an endik.

Joint Inspection Team-ah hian Lunglei SDC Deepak Godara hoin Food & Drugs Administration, District Level Advisory Committee, District Agriculture Office leh SP Office aiawhte an tel a ni.

Endiktute hian Lungleia ei leh in siamna leh zawrhna hmun 20 an tlawh a, chungte chu manufacturing unit pariat leh restaurant/cafe 12 a ni. Food Safety Standards Authority of India (FSSAI) hnuaia inkaihhruaina hrang hrang an zawm ṭhat leh ṭhat loh te, faina, thianghlimna leh hriselna kawnga an chet dan hrang hrangte an endik a; an dinhmun azirin point an pe nghal.

Lungleia ei leh in siamna hmunte chu faina leh thianghlimna kawngah leh ei tur vawn ṭhat danah an ṭha thawkhata hriat a ni a; FSSAI hnuaia inkaihhruaina zawm chungchangah duhthusam lo leh hmasawn ngai erawh an la awm tih hmuh a ni. Endikna report behchhan hian dan zâwm ṭha lo leh thianghlimna lama la hnufual deuh leh hmasawn ngaite chu hmasawnna tur hriattirna (improvement notice) pek a ni ang.

Hriattirna pek zinga hun tiam chhunga insiamṭha lote chu Food Safety and Standards Act, 2006 tlawhchhanin hrem theih an ni.