Tlabungin an thil phût nawr zel an tum

Tlabung RD Block Demand Committee (TRDBDC) huaihawtin November 2, 2019 khan Tlabunga V/C, tlawmngai pawlte leh political party hrang hrang aiawhte an ṭhukhawm a; sorkara an thil phûtte a hlawhtlin hma chuan tàwpsan loa nawr zui zel an rél.

Tlabung YMA Run-a rorelna kaihruaitu TRDBDC vice chairman TC Lalnunmawia chuan, Tlabungin hmasawnna tura an mamawhte thlen ve tawh ṭhin mah se, sorkarah rinna an nghah ṭhin avangin tharum thawha nawr an chíng ngai lo tih a sawi a; "Hei vang hian kawng hrang hrangin sorkarin a ngaihsak loh phah niin kan hria a, a ṭul a nih chuan na zawkin kan mamawhte nawr ve tura kan inbuatsaih a ṭul," a ti.

Kalkhawmte chuan, tun hnaia an thil phût chung­chang bawhzuia aiawh kalte Rural Development minister Lalruatkima'n a lo chhan dan chu lawmawm an tih thu leh, beiseina sang tak nen sorkar hmalakna ngaihchàn rih ṭha an tih thu an sawi.

Khawtlang hruaitu kalkhawmte chuan, tun hnaia sorkarin RD block headquarters atana hlànkai a tum ve khaw dangte nen hmun khata dah an duh lo tih an sawi a; an khuaa RD Block dah tura hmalakna chu thui tak lo kalpui tawh a nih avangin, sorkarin chak takin hma laksak se an duh thu an sawi bawk.