Lunglei district chhunga voter enfiah ngai mi 21,549 hnenah hearing notice pe tawh

Nimin khan Lunglei district election officer (DEO) Navneet Mann, bawrhsap hoin a pisaah Electoral Roll Special Intensive Revision (SIR) 2026 hnuaia Draft Electoral Roll ennawn leh a kaihhnawih hmalakna hrang hrang thlirho a ni. Bawrhsap chuan, Draft Roll-a Lunglei district-a voter 98,808 zinga enfiah ngai mi 21,549 hnenah hearing notice pek a nih tawh thu a sawi.

Navneet Mann chuan, SIR chu vote nei thei dik takte electoral roll-a thun an nih theih nan leh vote nei thei lote paih an nih theihna tura buatsaih a nih thu a sawi a, "Draft Electoral Roll-ah Lunglei district-a constituency parukah voter 98,808 an awm a, chu'ng zinga enfiah ngai mi 21,549 hnenah hearing notice pek a ni tawh. Enfiah ngaite hi SIR 2005-a zawmpui nei lo (no mapping) te, zawmpui nei, an inziah dana felhhlel awm (mapping with discrepancies) leh Electoral Registration Officer (ERO)-te'n rinhlelhawm leh enfiah ngaia an ngaihte an ni," a ti.

Lunglei DEO sawi danin, Lunglei district-a voter rinhlelhawm, hearing notice pek tamna ber chu West Tuipui bialah niin, mi 7,484 an ni a; Thorang bialah mi 4,388 hnenah notice pek a ni tawh. Constituency dangah pawh mi eng emaw zat notice pek a ni.

Electoral Roll-a hming chuangte chu uluk taka enfiah mek a ni a, ERO leh AERO ten khaw hrang hrangah hearing notice pekte insawifiahna hun an buatsaih chho mek. Electoral Roll dik leh felfai tak a awm theih nan notice dawngtute chu hunbi ruatah an dinhmun tihchianna lehkha pawimawh (document) pawm chin kenga inlan ṭheuh turin DEO chuan a ngen.

Navneet Mann chuan, SIR 2026 chu Election Commission of India kaihhruaina hnuaiah langtlang leh felfai taka kalpui mek a nih thu sawiin, tlawmngai pawl, political party leh mipuite ṭawiawmna leh thawhpuinaah lawmthu a sawi a; hlawhtling taka SIR 2026 kalpui a nih theih nan theihtawp chhuah zel turin a sawm nghal.

Ṭhutkhawmah hian political party hrang hrang aiawh te, Lungleia YMA Sub-Headquarters, MHIP Sub-Headquarters leh MUP Headquarters aiawhte leh media leh Election official-te an tel a ni.