MZP inthlan tur chungchang sawifiah

Mizo Zirlai Pawl (MZP) president L Ramdinliana Renthlei chuan nimin khan an pisaah thuthar thehdarhtute a kâwm a; MZP hruaitu thlan  lo awm tur chung­chang a sawifiah.

L Ramdinliana Renthlei chuan, November 6, Nilainia MZP hruaitu thlanna neih tur chu inthlan­na felfai leh dik tak a nih ngei an beisei thu a sawi a, "Vote nei dik takte'n vote an thlak theih nan MZP Election Commission chuan hma kan la a, kum danga kan tih ngai lohte pawh kan ti dawn," a ti a; media-te chu an inbuatsaihna leh inthlan dan turte mipui hriata puanzar kawnga thawhpuiah a sáwm.

MZP President sawi danin, MZP inthlanah hian MZP general headquarters-a office bearer tur paruk, adviser 10, appointed OB 12, NESO Council member 10 leh Executive Committee member 70 ten vote khat ṭheuh an nei. MZP headquarters 12-te'n vote 15 ṭheuh, sub-headquarters 46 leh college 25 (Kamalanagar College tel loin) ten vote pasarih ṭheuh, hnam pual zirlai pawl pariatte'n vote 20 ṭheuh leh, MZP branch 65-te'n vote pakhat ṭheuh an nei bawk. Vote awm zawng zawng chu 1,010 a ni.

Vote nei tur zawng zawng tan identity card siam a ni a, chu chu vawiin nileng leh naktuk Nilaini zing 6-9 chhungin pek chhuah a ni ang.