NEET exam zawhna pût ru duh loin MZP-te'n punkhawm an huaihawt

Mizo Zirlai Pawl (MZP) chuan nimin khan kumina NEET-UG exam zawhna pût ru duh lohna lantir nan Aizawl leh district khawpui hrang hrangah 'Peaceful protest against NEET paper leak' an huaihawt a; resolution paruk siamin, sorkar laipuia thlen an tum.

MZP bultum hian Aizawl bakah Lunglei leh Serchhipah punkhawm huaihawt a ni. Aizawlah chuan Vanapa Hall kawtah punkhawm a ni a, Lungleiah chuan Old Tennis Court aṭangin (Bazar Veng lamah kualin) DC pisa tual thleng kawng an zawh a, Serchhipah chuan Bazar kâwnah punkhawm a ni.

Aizawla punkhawm-naah hian MZP president C Lalremruata chuan thusawiin, India ram hmun hrang hranga NEET-UG exam zawhna pût ru duh loh lantira hmalaknate chu an thlâwp thu a sawi a, "Nimin (July 22)-a hmalaknate kha kan thlawp em em. Kan zirlaipui leh ṭhalaite'n min duhkhawp lohna thâwm kan hria a, in ngaihdamna kan dil a, thurawnte pawh min pe zel turin kan sawm che u a ni," a ti a; kil tinah Zo fate nêktu an awm avangin ṭanrual zel a ṭul thu a sawi.

NEET-UG exam paper pût ru chu Mizorama zirlaite pawhin an tawrh nasat thu sawiin C Lalremruata chuan, "Direct takin Mizo zirlai 2,000 chuangin an tuar a, a pawi tak zet a, hetiang hi a thlen nawn tawh loh nan sorkar laipui hian hma la ngei se kan duh. Kum dangah pawh hetiang hi a thleng fo a, NEET exam dan kalphung ṭha zawk a awm theih nan NEET exam buaipuitu NTA hi siamṭhat ni ngei se kan duh," a ti bawk.

MZP RESOLUTION

▶ NEET-UG 2026 exam-a question leak out hi kan dem takzet a, a thlen nawn tawh loh nan central sorkarin hma la nghal rawh se.

▶ NEET question leak out vanga kan zirlaipui nunna chán tate kan tawrhpui a, sorkarin zangnadawmna pe ngei rawh se.

▶ Exam dan kalphung langtlang leh ṭha zawk kan neih theih nan National Testing Agency siamṭhat ni rawh se.

▶ He thil thleng vanga peaceful protester-te chunga police-te tharum thawhna thleng kan dem a, democracy ramah hetiang hi thleng nawn tawh lo se kan duh.

▶ Tih luihna hmanga protest hmahruaitu Sonam Wangchuk, sorkarin Safdarjung Hospital-a tihluihna hmanga a hrêng hi kan dem a, thu tiamkam awm loa chhuah nghal turin kan phût.

▶ Mizo zirlaite himna leh hamṭhatna atan vawiina Mizo zirlai leh ṭhalai kal khawmte hian lungrual taka thawhho zel ni se kan ti.