Bangladesh aṭanga rawn tlanchhiate dawnsawn dan ngaihtuah a ngai - HM
Home minister K Sap-danga chuan, Bangla-
desh tlang ram aṭanga Mizorama rawn tlan-chhia Zo hnahthlak leh Zo hnahthlak ni lote lo dawn-sawn dan tur ngaihtuah ngun a ngaih thu a sawi.
K Sapdanga hian The Zozam Times chanchinbuin nimina IPR Auditorium, Aizawla 'Bangladesh tribal chîmral mekin Mizoram a nghawng theih dan leh Chittagong Accord' tih zirhona an buatsaih a hmanpui a; MLA Lalmuanpuia Punte khualzahawm a ni.
Home Minister chuan, Bangladesh tlang ram, Chittagong Hill huam chhunga cheng Zo hnahthlak te, Bru leh Chakma te chu an ram lailia cheng Muslim-te'n an chenna luahlan tuma an ûm chhuah thu leh, chuvang chuan himna zawnga an tlanchhiat thu a sawi.
Bangladesh aṭanga tlanchhiaa Mizorama lutte chu kohhrante'n chhandam ngai an nih ve tho hriain an lo enkawl tih sawiin Sapdanga chuan, "Kan unau Zo hnahthlakte ni mah se, sorkar danah ramri pawn lam mi an nih miau avangin hnam khat nihna vanga induhsaknain awmzia a neih loh châng a awm ṭhin. Central-a sorkar a inthlak hian tìm deuh ngaih chang leh thil phal deuh theih lai a awm ta fo a, Mizoram mipui tan pawh awm dan tur thiam a har châng a awm fo," a ti.
K Sapdanga chuan, Bangladesh aṭanga Mizorama rawn lut zingah Chakma leh Bru tam tak an tel thu sawiin, "Tlawmngai pawlte'n hnam himna a buai an hlau a, political party-te'n ram himna an ngaihtuah leh a, Kristian kan nih angin kohhranin ṭha takin a lo dawngsawng lo thei bawk si lo. Tuna ngaihtuah ngai ta chu, engtianga lo dawnsawn tur nge tih hi a ni," a ti a; ngaihtuah tur tam tak a awm thu a sawi.
Home Minister chuan, zirhona chu sorkar, hnam, kohhran leh tlawmngai pawlte tan ngaihtuahna mit tikeutu a nih a beisei thu a sawi bawk.
Adviser to CM (Political) Lalmuanpuia Punte pawhin thu sawiin, Mizoram chhehvela mite dinhmun leh Mizorama an luh chhan hriat chian chu ram dinhmun tichiangtu a nih avangin a pawimawh thu leh, chutiang atana zirhona buatsaih chu ṭha a tih thu a sawi.
Zirhona hi The Zozam Times editor Tuikhuahthanga'n a kaihruai a, Mizoram University-a associate professor Dr Lalrinnunga Hmar-in thupui a sawi a, sawiho zui a ni. Tlawmngai pawl, political party leh zirlai pawl hruaitute leh college students’ union aiawhte an tel.