SIR 2026 Draft Electoral Roll-ah Voter-te leh dilnate endik mek a ni

Mizorama Special Intensive Revision (SIR) 2026 neih mekah Draft Electoral Roll-a dilna lutte chinfel hna (hearing) district hrang hrangah an ṭan a ni tawh. Kolasib district-ah chuan July 21, 2026 khan ṭan a ni a, Serchhip district-ah chuan July 22 khan ṭan a ni.

SIR 2026 Draft Electoral Roll hearing-ah hian Draft Roll-a hming chuang zinga SIR 2005 Electoral Roll-a zawmpui nei lo (no mapping) te, zawmpui nei, mahse, an inziah dana felhhlel awmte (mapping with discrepancies) leh rinhlelhawm leh enfiah ngai te, kumtling thar inthun dil te, siamṭhat duh leh insawn duh insawn dilnate Electoral Registration Officer (ERO) leh Assistant ERO ten an endik a ni.

Serchhip constituency chhunga polling station (PS) pathum - Thenzawl-I, Thenzawl-III leh Thenzawl-IV te tan July 22 khan ERO K Lalhlimpuia leh AERO Vanthangpuia hoin Thenzawlah hearing neih a ni a; nimin khan chhunzawm a ni.

Nimin vek khan Tuikum biala PS hrang hrangte tan Chhiahtlangah ERO Rebecca Laldinmawii Hrahsel leh AERO Chawngthu Lalrinhlua te hoin hearing neih a ni a; Hrangturzo biala PS-te tan ERO Dr Marilyn Lalruatkimi hoin hearing neih a ni bawk.

Kolasib district-a ERO Lalvenhimi Ralte chuan nimina electoral roll observer Dr Lalrozama hoa ṭhutkhawmah, SIR hearing chu June 21 khan an ṭan thu a sawi a; hearing-a inlan mi tam zawk chu an harsatnate chinfel a nih rualin, mi ṭhenkhat chu document neih kim loh vangin kal nawn tura tih an nih thu te, August 5, 2026-ah hearing zawh hman tum a nih thu a sawi bawk.

Kolasib election officer Chinlianmanga sawi danin, SIR 2026 Draft Electoral Roll-ah Kolasib district-ah voter 61,340 an awm a, chung zinga mi 12,223 chu mapping theih loh an ni.