Sorkar laipui aṭanga kan sum hmuhte ṭha taka hman a ni ang - Dr Vanlalthlana

Ministry of Education hnuaia Department of School Education & Literacy (DoSEL) chuan nimin khan Delhi-ah ni hnih awh tur 'Conclave of State/UT Education Ministers on Review of Centrally Sponsored Schemes' an buatsaih a; Education minister Dr Vanlalthlana chuan, sorkar laipui aṭanga sum hmuhte ṭha taka hman zel a nih tur thu a sawi.

Education Minister chuan, Samagra Shiksha kum hmasa budget 51% chauh hman a nih chhan chu Central-in SNA SPARSH kalphung a thlak vang leh Reserved Bank of India (RBI) leh Ministry timing inmil loh vang a nih thu a sawi a, "Central aṭanga sum dawn ṭhinte chu ṭha taka hman zel a ni ang," a ti.

Zirtirtute leh school dinhmun endikna atan Vidya Samiksha Kendra (VSK) portal-ah sorkar sikul thlalak leh project dah luh a nih thu sawiin Minister chuan, Mizoram chuan Performance Grading Index (PGI)-ah hma a sawn mek thu a sawi.

Dr Vanlalthlana chuan, Mizoram zirna tihhmasawnna tura hmalakna lian zual leh hmachhawp pawimawh tak tak a awm thu a sawi a, "NEP 2020 zûlzuiin secondary leh higher secondary zirlaite tan science leh mathematics zirlaibute Mizo leh Sap ṭawng inkawpa siam a ni tawh," a ti.

Education Minister chuan, chawlhkar khatah ni khat 'Home Language Day' leh 'Hindi Speaking Day' atan ruahman a nih thu sawiin, "Khawpui leh thingtlang zirna inthlauhna sutkian nan Standardized Assessment for Elementary Schools hmangin state puma common question system hman ṭan a ni," a ti a; sikul tihchangtlun leh thawm ṭhat hna chak zawka a kal theih nan state PWD kuta hlan vek a nih thu a sawi bawk.

Intawhkhawmnaah hian DoSEL hnuaia centrally sponsored scheme pahnih - Samagra Shiksha leh PM POSHAN chungchanga hmalakna leh hmathlirte sawiho a ni a; Mizoram Education Minister hi SChool Education secretary K Lalthawmmawia leh Samagra Shiksha state project director C Lalthanzira ten an ṭawiawm a ni.