KHAWTHLIR

Thisen pe

Assembly of God Bible School chuan nimin khan thisen pek huaihawtin, Civil Hospital, Aizawl tan thisen unit 54 an pe a, petute 47 leh hmeichhia pasarih an ni.

Heroin man

Mizoram Police CID (Special Branch) leh Central Anti Drugs Squad ṭang dun chuan July 22, Nilaini zan dar 9 vel khan Ṭhuampui, Aizawla Delhi Dhaba bulah lirthei pakhat aṭangin methamphetamine kg 9.016 an man a, lirthei khalhtu Malsawmtluanga (29), Zokhawthar nia inchhál an man nghal. NDPS Act Section 22(c) leh 25 tlawhchhanin thubuai ziah luh a ni.

National Flag Day

Assam Rifles chuan July 22, Nilaini khan Mizoram hmun hrang hrangah National Flag Day an hmang. AR hian National Flag Day pual hian Lunglei, Parva, Lungpuk leh Siahaah te sikul naupangte tan lemziaka inelna an buatsaih bakah, hnam puanzar chungchang an hrilhfiah a ni.

Free Health Camp

Khawzawla District AIDS Prevention & Control Committee, Chief Medical Office, SP Office, Transportation Office leh Zoram Drivers Union te chuan nimin khan Khawzawl Zaingen YMA Hall-ah sumdawnna lirthei khalhtute leh sorkar driver-te pualin Free Health Camp an buatsaih a, bawrhsap K Vanlalṭhiana'n a hmanpui. Camp-ah hian mi 91 hriselna dinhmun enfiah a ni a, sorkar driver 29, sumdawnna lirthei khalhtu mi 26 leh mi dang 36 an ni.

Thuthlung ziak

Social Welfare, Women & Child Development department leh SELCO Foundation chuan nimin khan Secretariat Conference Hall-ah Anganwadi Centre 300-te thuam chakna turin memorandum of understanding an ziak a, SWWCD minister Lalrinpuii'n a hmanpui. Thuthlungah hian SWWCD secretary Lalzarmawii leh SELCO Foundation senior project manager Lalnuntluanga ten hming an ziak a, kum hnih awh tur a ni. MoU hmangin anganwadi centre 300 chu ṭha zawk leh hman tlak zawka thuam a ni dawn a, solarisation December 2026-ah zawh tum a ni.