Hna thawh mek leh thawh leh turte Chief Minister kaihhruaiin thlirho a ni

24th July, 2026

Chief minister Lalduhoma kaihhruaiin nimin khan CMO conference hall-ah Mizoram Pro-Active Governance and Timely Implementation (Mi-PRAGATI) chu a ṭum lina atan an ṭhukhawm a, Mizorama hna thawh mek leh thawh leh turte an thlirho.

Ṭhutkhawmah hian Home minister K Sapdanga, PWD minister Vanlalhlana, EFCC minister Lalthansanga, Tourism minister Lalnghinglova Hmar, chief secretary Khilli Ram Meena bakah official dangte an tel a; district tina bawrhsapte'n online hmangin an lo zawm.

Chawnpui, Aizawla Ekta Mall sak mekah physical progress 21% a ni a; hmanruate endik (test)-na tur laboratory bun a ni tawh a, hmanrua leh khawl mamawh zawng zawng an la khawm tawha sawi a ni.

Vairengte-Sairang inkar kawngpui (NH 306 & 06) thlír lí ni tura zauh mek chungchangah, ṭhutkhawm hnuhnung ber leh nimin inkarah hnain 2%-a hma a sawn thu tarlan a ni. Tun thlengin Package-3 chinah hna 19.25% zawh tawh a ni a, Package 4-ah 17.82%, Package 5-ah 14.90%, Package 6-ah 8.76%, Package 7-ah 13.67% leh Package 8-ah 14.12% zawh a ni tawh bawk.

Hmun ṭhenkhatah ram neitu nih inchuh vangin court-ah thubuai a awm a, court thutlukna nghah mek a ni. Tuna NH kawngpui awm sa pawh short term maintenance contract hmanga siam mek a ni a, thawh tur chin zawh ṭêp tawh a ni.

ṬHUTKHAWMA REL LEH SAWITE

◆ Aizawl Western Side By-Pass Road laih meka harsatna - dumping site, zangnadawmna la tihfel loh, ratlante awmna sawn leh forest clearance chungchang an sawiho a ni a; ṭhutkhawm hmasaka sawi tawh bawhzui tawh chinte report niin, tih tur la awmte chak taka bawhzui zel ni se, an ti.

◆ Neihloh khaw sawn turah, chhungkaw eng emaw zatin an in thar tur an sa ṭan tawh a, vantlang hmun pawimawh din turte pawh ṭan thuai beisei a ni. A panna kawng laih (fomation cutting) chu 90.93% zawh a ni tawh.

◆ Khamrang-Selesih kawng laih meka harsatna - forest clearance, PIL leh zangna-dawmna chungchangte sawiho a ni. Kawng laihna sum NABARD RIDF a tawp tawh avangin kawng lai zui zel tur chuan state sorkar sum hman a ngai tawh dawn.

◆ Sihhmui kawngpui aṭanga Sairang rel chawlhhmun panna kawng zauh leh Suaka Cricket Stadium panna kawng siam tur chu a rang lama bawhzui ni se, an ti.