Damdawi-in fai leh thianghlima inentir mipuite'n an phû - Health Minister

Civil Hospital, Aizawl chuan nimin khan an conference hall-ah sorkar damdawi-in fai inelna, Kayakalp Award 2025-26 lawmman pakhatna an dawn an lawm a; khuallian Health and Family Welfare minister Lalrinpuii chuan, mipuiin damdawi-in fai leh thianghlima inentir an phû thu a sawi.

Kayakalp hi Swachh Bharat Mission hnuaia Ministry of Health and Family Welfare buatsaih a ni a; Civil Hospital, Aizawl hian kum 2025-26 atan district hospital fai ber lawmman an dawng a, kum 2015 khan an lo dawng tawh bawk.

Health Minister chuan, India Danpuiin mipui dikna chanvo a pek zinga tel Right to Health chu sorkar hnathawk, a bikin damdawi-ina thawk zawng zawngin an zah a ṭul thu sawiin, "Damlo kan dawnsawnnaah theihtawp kan chhuah thar a ngai. Mipuite'n damdawi-in fai leh thianghlima inentir an phú a, thawktu zawng zawngte'n faina leh thianghlimnaah hma kan lak chhunzawm a ngai," a ti a; damdawi-in pantute hawihhawm taka dawngsawng a, nui hmél pu tam turin thawktute a chah.

Civil Hospital, Aizawl chu doctor thiam ber berte leh hmanraw changkang leh chhuak thar chi tinrenga thuam a nih thu sawiin Lalrinpuii chuan, "Mipuiin an pan nasa a, thawktute an hah hle chunga hospital enkawl fai lawmman in dawng thei hi in chhuanawm," a ti.

Health Minister chuan, MUHCS hman ṭan a nih dawnah Civil Hospital, Aizawl chu nurse 300, multitasking staff 100, paramedical staff 47 leh medical officer eng emaw zata thuam chak a nih thu a sawi bawk.

Kayakalp Award lawmna hi Health secretary K Lalrinzuali'n kaihruaiin, senior medical superintendent Dr Lalchhuankimi'n report a pe a; Health principal director Dr Lalthlengliani leh medical superintendent Dr K Rothangpuia te pawhin thu an sawi a ni.