Electoral Roll Observer-in Kolasib a tlawh

Electoral roll observer Dr Lalrozama, Higher & Technical Education secretary chuan nimin khan Kolasib a tlawh a, DC conference hall-ah sorkar official-te leh pawl aiawhte kâwmin, Special Intensive Revision (SIR) 2026 neih mek chungchang a sawipui.

Dr Lalrozama chuan, Election Commission of India (ECI)-in electoral roll a ngai pawimawh thu sawiin, SIR neih mek chu a pawimawh thu a sawi a, "Kumina SIR hian kum 2005-a mi nen a inmil em, siamṭhat ngai a awm em tihte endik a ni a, mipui tan chî-âina tur a awm lo a, tu pawh vote nei thei tur dik tak electoral rollah an inziah luh theih nan ruahman a ni," a ti.

Electoral roll-in India ram leh Mizoram tan pawimawhna thûk tak a neih thu sawiin Observer chuan, "Nghawng a neih nasat em em avangin electoral roll thianghlim, rintlak leh dik tak nei turin theihtawp chhuah a ṭul," a ti a; Kolasib a tlawh chu sawisel tura kal ni loin, hnathawh mekte ECI kalphung nen a inmil leh inmil loh enpui a, a ṭul anga pui tura kal a nih thu a sawi.

Inkawmhona kai-hruaitu district election officer H Dolianbuaia, bawrhsap chuan, electoral roll ennawnah mi tinin mawhphurhna an neih thu a sawi a, "Tun chinah thawktute'n theihtawp chhuahin hna an thawk a, a lawmawm hle a ni," a ti.

Ṭhutkhawmah hian sorkara Election lama thawktu te, political party aiawh te, Mizoram People Forum, MUP, MJA leh MZP aiawhte an tel a ni.