Cooperative Development Council ṭhukhawm

Nimin khan Cooperation minister PC Vanlalruata hoin a pisaah Mizoram State Cooperative Development Council (MSCDC) an ṭhukhawm.

Cooperation Minister chuan, MSCDC chu a hming maia din ni loin, a taka cooperative sector hmasawnna tura din ṭhat leh (reconstitute) a nih thu a sawi a; cooperative society-te ṭhan zelna atan theihtawp chhuah theuh turin member-te chu a fuih.

Ṭhutkhawmah hian Mizorama cooperative sector-in hma a sawn theihna tur hrang hrang sawiho a ni a; district thar pathum - Saitual, Khawzawl leh Hnahthial-ahte Cooperation office hawn a nih theih dan tur leh Mizorama Institute of Cooperative Management din a nih theihna tura chak zawka hmalak dan tur te, MULCO tihchangtlunna atan bawng 100 la lut tura hmalakna kal mek te, M-PACS-te tan fertilizer license tam zawk neih theih dan turte sawiho a ni.

PMBJAK (Pradhan Mantri Bhartiya Jan Aushadhi Kendra) hnuaiah damdawi man tlawm zawka zawrhna pakhat awm chu cooperative society kaltlanga hawn belh a nih theihna tura hmalak dan tur ngaihtuah a ni a; state level cooperative federation-te tihchangtlun dan tur leh Cooperative Development Council pisa neih theih dan turte ngaihtuah a ni bawk.

MSCDC-ah hian vice chairman chu VL Zaithanzama, MLA a ni a; member-ah MLA pahnih - K Laldawngliana leh K Hrahmo bakah, MSCDC member hrang hrang, sorkar official leh private member-te an tel a ni.