Remruata'n a vawi 100 nan thisen a pe; Health Minister hoin hun hman a ni

Mizorama thisen pe tam bera chhàl ṭhin C Lalremruata, Electric Veng, Aizawl chuan nimin khan a vawi 100-na atan thisen a pe leh a, thisen a pek vawi 100-na pualin Electric Veng Branch YMA chuan thisen pek rûnpui an buatsaih nghal a, Health minister Lalrinpuii'n a hmanpui.

C Lalremruata'n thisen a pek vawi 100-na puala Electric Veng YMA Hall-a thisen pek rûnpui huaihawtah hian bialtu MLA minister K Sapdanga'n lawmpuina Rs 15,000 leh Health minister Lalrinpuii'n Rs 5,000 leh thuchei a hlan. Electric Veng YMA leh Local Council bakah, pawl leh mimal eng emaw zatin chawimawina leh lawmpuina an hlan bawk.

Health Minister chuan, C Lalrem-ruata’n thisen vawi 100 a pe tling ta chu ropui a tih thu sawiin, "Mi dangte ṭanpui nan leh nun chhan nan thisen vawi 100 a pe thei ta hi zahna chibai ka bûk a, Pathianin vengin awmpui se, hei aia tam a pek zel ka beisei," a ti.

Thisen pek a pawimawh thu sawiin Lalrinpuii chuan, "Kan mihringpuite nunna chhan nan thisen pek hi kan uar deuh deuh a ngai. Thisen mamawhtu damlo an pung tual tual a, thisen mamawhna a sang tual tual. India ramah a ti ṭha pawl tak kan ni a, thisen pek hi mimal leh pawl anga kan uar zel a ngai a ni," a ti a, thisen pek uar zel turin ṭhalaite a sáwm.

C Lalremruata chuan, kum a tlin hmain damlo chhungte'n thisen pe turin an ngen a, a la pek theih si loh avanga hrehawm a tih thu sawiin, "Kum ka tlin hunah thisen a tam thei ang ber ka pe ang tiin rilru an siam a, tun dinhmun thleng tur hian ka intiamna chuan min nawr kal niin ka hria," a ti.

Inkhawmpui Electric Veng YMA president C Lalnunfela'n a kaihruai a; thisen pen rûnpui an huaihawtah hian Civil Hospital, Aizawl tan thisen unit 100 an pe a, petute mipa 94 leh hmeichhia paruk an ni.