KHAWTHLIR

Scooter chesualah Mamit nula thi

H Lalchhanhimi (36) d/o Rothansiama Hnamte (L), Mamit Chhimveng chu July 23, Ninani zan khan scooter-a chetsualnaah na takin a hliam a, nimin zing dar 5:30 khan a hliam tuar loin Ebenezer Medical Center-ah a thi. Thu dawn danin, H Lalchhanhimi hi middle school zirtirtu niin, Mamit District Football Association-ah Executive Committee member ni lai a ni a; Ningani zan khan a unaunu a thlah tur chu Mamit Lungsir Vengah scooty brake ṭha lo avangin an chesual a, a mi phurh pawh na takin a hliam a ni.

MHIP jubilee lawm

Armed Veng South MHIP chuan nimin khan an kum 40-na, ruby jubilee an lawm a, bialtu corporator Christina Roluahpuii Sailo-in a hmanpui. Christina Roluahpuii chuan, MHIP chu kohhran chauh ni loin, khawtlang hmasawnna, chhungkaw nun, naupang leh ṭhalai nun kaihhruaina leh mi retheite puihnaah pawh thawktu pawimawh an nih thu a sawi. Armed Veng South MHIP hian Corporator hi executive corporator a nih avangin chawimawina an hlan a ni.

SWM Rules 2026 August-ah hman rêl

Lawngtlai district bawrhsap Donny Lalruatsanga kaihhruaia sorkar hotute ṭhukhawm chuan, August 2026 aṭangin Lawngtlai district-ah a remchan dan anga bawlhhlawh thliar dan thar, Solid Waste Management Rules 2026 kalpui an rêl. Mumal taka bawlhhlawh thliar hran chu zirna-in, sorkar office, institution leh damdawi-inah te kalpui ngei tura hmalak ni se, an ti.

August 10-ah NDD

Lunglei District Coordination Committee for National Deworming Day chuan nimin khan Lalhruaitluangi kaihhruaiin rûlhût hlo pek beihpui thlak thawh hnihna, National Deworming Day (NDD) Second Round 2026 kalpui dan tur an sawiho. NDD thawh hnihna hi August 10, 2026-ah neih tura ruahman a ni a, Lunglei district-a kum 1-19 inkar mi 44,205-te pek tum a ni.