Vanneihtluanga leh PL Liandinga hnenah MWA-in Mizo Literary Award 2026 an hlan

Mizo Writer Association (MWA) chuan July 23, Ningani khan Vanapa Hall-ah 'Thu leh Hla Kûtpui' an hmang a; Mizo zinga thu leh hla lama sûlhnu nei ṭha pahnih - PL Liandinga, Khatla South leh Vanneihtluanga, Chanmari, Aizawl hnenah Mizo Literary Award an hlan.

MWA hian kum thum dana an neih ṭhin Thu leh Hla Kûtpui hi an president R Lallianzuala'n a kaihruai a; MWA Executive Committee member F Vanlalrochana'n Mizo Literary Award an hlan tak PL Liandinga leh Vanneihtluangate chanchin a sawi.

Mizo Literary Award dawng tura thlante hnenah MWA adviser B Lalthangliana'n chawimawina a hlan a; award hian thuchei leh Rs 5,000 a keng a ni.

Thu leh Hla Kûtpuiah hian tun hnaia Mizoram University-in under graduate final examination result a tihchhuaha BA Mizo subject-a mark hmu sang ber hnenah chawimawina an hlan bawk.