CYMA hruaitute'n Lawngtlai district-ah SIR 2026 Draft Electoral Roll bawhzui

Electoral Roll Special Intensive Revision (SIR) 2026 kalpui mek bawhzuiin Central YMA hruaitute chuan Lawngtlai district an tlawh a; July 23, Ningani khan Lawngtlai district election officer (DEO) Donny Lalruatsanga, bawrhsap kaihhruaiin SIR 2026 chungchang Lawngtlai East bialt MLA Dr Lorrain Lalpekliana Chinzah, Central YLA hruaitute leh official-te nen an sawiho.

MLA Dr Lorrain Lalpekliana Chinzah chuan, electoral roll dik leh rintlak a awm theihna tura CYMA leh CYLA hmalakna fakawm a tih thu a sawi a; official-te leh NGO-te hmalakna chu ṭhahnemngai taka ṭawiawm turin political party-te a sáwm.

CYMA assistant secretary SF David Ngursangzuala chuan, electoral roll siam mek chu Mizoram hma lam hun thui tak nghawng tur a nih avangin fimkhur tlan a ṭul thu a sawi a, "Hming chuang thei lo turte an chuan lohna turin thawktute chu dik taka hna thawk turin kan ngen a, he lam hawia CYLA hmalaknate CYMA chuan a thlawp tlat a ni," a ti.

CYLA president F Lalrothanga pawhin, hearing neih mekah dan kalha electoral roll-a luh tum awm theihna khuate chu CYLA in an ṭhutchilh vek thu leh, YLA branch-te chu theihtawp chhuah tura an hriattir thu a sawi.

Lawngtlai DEO chuan, Lawngtlai district chu Myanmar leh Bangladesh ramri nei, raltlan eng emaw zat awmna a nih vangin electoral roll ennawnah an fimkhur thu a sawi a, NGO, VC leh kohhrante nen thawhhona ṭha tak an neih thu a sawi bawk.

Election officer Collin Hlychho tarlan danin, SIR 2026 Draft Roll-ah Lawngtlai district-a constituency pathumah insawifiah ngai (anomalies leh discrepancies) voter 32,373 an awm a ni.

CYMA hruaitute hian Ningani vek khan Chawngte an thleng a, Central Young Chakma Association hruaitute leh AERO-te an kâwm a; nimin khan Chawngte BDO Lalnunpuia Renthlei pisaa hearing-ah an tel bawk.