Siaha College-ah Job Fair buatsaih

Labour Employment, Skill Development & Entrepreneurship (LESDE) department bultumin nimin khan Saiha College leh Champhai College-ah Job Fair buatsaih a ni.

Job Fair hi Ministry of Labour & Employment hnuaia National Career Service project aṭanga buatsaih a ni a; hna thawh tur nei (job provider) leh hna zawng mek (job seeker)-te thlun zawmna tura tih a ni. Champhaia Job Fair-ah stall 22 hawn a ni a; a hmuna hna hmu nghal an awm bakah, hna ruak diltu, interview leh document endik hmabak eng emaw zat an awm. EMPEX portal registration leh Mizoram Building and Other Construction Workers Welfare Board-a inziah luh dan te, hamṭhatna awm theite inhrilh a ni a; career guidance leh skill development programme te buatsaih a ni.

Champhai College-a Job Fair hi Champhai North bialtu MLA H Ginzalala'n a hawng a, bawrhsap Mohammad Aaquib pawhin a hmanpui. H Ginzalala chuan, sorkar leh mi dangte hnena hna zawngtu chauh ni lo turin ṭhalaite a fuih a, mahni pual leh mi dangte tana hna siamsaktu nih theih a pawimawh thu a sawi.

H Ginzalala chuan, zirna leh eizawnna kawng zawhnaah hlawhtlin nghal loh theih a ni tih sawiin, "Beidawnna leh hlawhchhamna a thlen cháng a awm ṭhin a, chung hunah chuan beidawng mai loa beih ṭauh ṭauh a ṭul a, mahni thiamna leh tumruhna te hmanga bul ṭan ngam a pawimawh," a ti.

Siaha College-a Job Fair-ah chuan company/institution 15-in stall an hawng a, zirlai leh ṭhalai hna zawng mek ṭhahnem takin an chhim. Fair hawngtu additional DC Abraham Beirazi Khithie chuan, Saiha College chu zirna-in ṭha tak leh changtlung tak, zirtirtute pawh thawk rim tak leh inpe zo tak an nih thu a sawi a, "Hmasawnna tur tam tak a la awm a, lehkha zirna lama ṭan lak bakah, kawng engkimah hmasawn a ṭul," a ti.