Career guidance tam zawk buatsaih rel

Lawngtlai District Education Committee chu an chairman Donny Lalruatsanga, bawrhsap kaihhruaiin nimin khan an ṭhukhawm a; zirlaite zingah hma lam hun atana inkaihhruaina, career guidance tam zawk nei tura hmalak an rel.

Ṭhutkhawmah hian, zirna-inah civil work ṭha leh mumal zawk kalpui ni se, hemi hnuaia ruahmanna awm ang angte District Election Commitee (DEC)-ah thlen ni se, DEC-in uluk takin lo thlifim ṭhin se, an ti.

PM POSHAN hnuaiah sorkar sikul leh sorkarin a puih sikula zirlaite hnena chaw hrisel pek te, school attendance leh dropout tihhniam te, zirna ṭha zawk siam tura chak zawka hmalak te an rel. Nutritional garden changtluk zawk siamah sikul tinin ṭan an lak thar theih nan inzirtir ni se, fruit day chhunzawm zel se an ti a; nutritional garden nei ṭha sikulte chu Republic Day-ah chawimawi ṭhin an rel bawk.

Lawngtlai Bawrhsap chuan, zirnaa hmasawn turin sorkarin theihtawp a chhuah reng tih sawiin, "Thawhho thiam a pawimawh a, naupangte ṭhang len zelna turah elementary education ṭha a pawimawh. Zirna bulṭhut a nih angin chak zawka hmalak chhunzawm zel a ṭul," a ti a; zirnaah district dangte entawn tlak ni tura theihtawp chhuah turin kal khawmte a chah.