Larsap leh ITS officer tharte inkâwm

Governor Gen. Dr Vijay Kumar Singh chuan nimin khan Lok Bhavan-ah 'North East Study Visit' neia Mizorama rawn kal Indian Telecommunications Service (ITS) probation officer, 2023 batch-te a kâwm.

ITS probationary officer-te hian hmarchhak state-a inbiakpawhna leh a kaihhnawih hmasawnna ruhrel ṭha a awm theih dan tur te, harsatna awm theite leh harsatna chinfel dan turte an zir a ni.

Gen. VK Singh chuan, ITS officer tharte chu India rama telecom sector innghahna ni mai tur leh policy duang tur mi pawimawh tak tak an nih thu a sawi a, "India hmarchhak state-te hi tun hma lama ngaihdan - hmun hla, kalpawh harsa leh nunphung dang hlak ang kha a ni tawh lo a, sorkar laipui Act East Policy hmangin hmasawnna ruhrel nasa tak siam a ni," a ti.

Act East Policy hnuaia hmalakna Kaladan Multi-Modal Transit Transport Project chu danglamna leh hmasawnna hrang hrang thlentu tur a nih dawn thu sawiin Larsap chuan, "KMMTTP hi zawh a nih hnuah telecom sector-in hmalakna tam tak a neih dawn avangin officer-te inpuahchah lâwk a ṭha. Act East Policy hnuaiah hmarchhak state-in sumdawnna, khualzin hîpna, inkalpawhna leh inbiakpawhna bakah, hmasawnna hrang hrang a hmuh belh zel dawn a ni," a ti a; digital economy-ah telecom sector-a pawimawh zual zel dawn thu a sawi.