KHAWTHLIR

Thisen pe

July 25, Inrinni khan ṬKP, City Church, Aizawl unit chuan ṬKP platinum jubilee pualin Civil Hospital, Aizawl tan thisen unit 69 an pe a, petute mipa 53 leh hmeichhia 16 an ni. PYD (Mizoram UPC) Bazar Bial, Aizawl pawhin Synod Hospital tan thisen unit 32 an pe a, petute mipa 27 leh hmeichhia panga an ni.

Minister-in hawng

Fisheries minister Lalthansanga chuan July 24, 2026 khan Sialsuk Joint YMA-in PMMSY ṭanpuina 'Promotion of Recreational Fisheries' hmanga Sialsuk tlang dila khualbûk leh lawngleng chuan theihna hmun an siam a hawng a; bialtu MLA Baryl Vanneihsangi'n a hmanpui.

Ngaizel kawng khâr dawn

Aizawl district bawrhsap Lalhriatpuia chuan hriattirna chhuahin, Ngaizel pheia lung tla leh leimin hlauhawmna lai chu mithiamte ruahman angin vawiin aṭangin tuam (draping) a nih dawn thu a tarlang. Aizawl DC tarlan danin, Ngaizel pheia draping hna thawh chhung, vawiin aṭanga August 1, 2026 thlengin ni tin chawhma dar 10 aṭanga tlai dar 4 thleng kawngpui khar ṭhin a ni dawn a; Nghakliana Filling Station pawh hna thawh hun chhungin khar tur a ni ang.

Kuhva, heroin leh meth man

Assam Rifles leh Customs mite chuan July 25, Inrinni khan Champhai leh Khawzawl inkar an dapnaah kuhva rah ip 501 (kg 40,080) an hmu chhuak a, Rs 4,12,42,320 hûa chhût a ni. July 25 vek khan AR sipaite leh police-te'n Ngopa Y Junction-ah Lalnunsiem, Churrachandpur nia inchhál hnen aṭangin heroin gram 67 an man a, Saitual Police Station-ah an hlan. July 24, 2026 khan Sairangah AR leh police-te'n hnam dang mi pali hnen aṭangin methamphetamine kg 2.189 an man bawk.

YWCA inkhawmpui an hmang

Young Women’s Christian Association, Aizawl chuan July 25, Inrinni khan Salvatoin Army Aizawl Bazar Corps Fellowship Hall-ah Annual General Meeting an hmang a, member ṭhahnem tak an tel. Kum 2026-27 chhunga hruaitu tur an thlang a, president atan Dr Alice Lalchhandami Fanai, vice president atan Judy Lalfakzuali, teasurer atan Lal-hmingliani Hmar te an thlang a ni.