Narcotics Awareness Campaign ṭan a ni

Social Welfare department leh Mizoram Presbyterian Kohhran chuan nimin khan ruihhlo ngaite chhan chhuahna tur leh ruihhlo ṭhat lohzia inzirtirna tura buatsaih Narcotics Awareness Campaign bul an ṭan.

Narcotics Awareness Campaign bul ṭanna hi nimin Pathianni tlai dar 3 khan Aizawla Chanmari Presbyterian Kohhran Hall-ah buatsaih a ni a, Social Welfare minister Lalrinpuii'n a hmanpui. Awareness hi Aizawl leh a chhehvela kohhran 27-ah neih chhoh tura ruahman a ni.

Awareness Campaign-ah hian Social Welfare department hnuaia MSDRB leh Mizoram Drugs User Forum(MDUF) aṭangin resource person leh counsellor ten hun an hmang ṭhin dawn a; campaign neihnaah hian ruihhlo ngaite chauh ni loin, an chhungte pawh sawm tel a, family sensitisation hun buatsaih thin a ni ang.

Social Welfare Minister chuan, Mizoram sorkarin Hulhliap Short Stay Centre a buatsaih chu a hlawhtlin viau laiin, kawng chi dang danga ruihhlo vanga harsatna tuarte puih dan tur sorkarin a ngaihtuah zel thu a sawi a, "Hautak lutuk si lo, system ṭangkai si neih a tul a, chumi atan chuan Narcotics Anonymous kalpui a ṭul," a ti.

Lalrinpuii chuan, ruihhlo sim tawhte enkawl zui leh thiamthil an neih theihna tura zirtirna (after care skill training)-ah Mizoram sorkarin Mizoram Synod bakah, Baptist Kohhran, Evangelical Church of Maraland, Lairam Isua Krista Baptist Kohhran leh tlawmngai pawlte thawhpui dan tur a duan mek thu a sawi a; awareness campaign an hman zel turah mamawhtute'n ṭangkai taka an hman theih nan ruihhlo vanga harsatna neite kalpui turin kohhran, tlawmngai pawl leh chhungkua te a ngen.

Narcotics Awareness Campaign bul ṭanna inkhawm hi Chanmari Kohhran upa Peter Zohmingthanga, Excise & Narcotics joint commissioner ni bawkin a kaihruai a; MDUF leh MSDRB lamin inzirtirna hun an hmang a ni.