Lirtheia chetsualnaah mi pahnih thi

May 25, Inrinni khan Mizoram hmun hniha lirtheia chetsualnaah mipa pahnih - Lalvuana, Thingsulthliah leh Zoramcheuva, Pangkhua te an thi.

Inrinni chhun dar 12:30 vel khan Thiltlang leh Pangkhaw inkarah pick-up a chesual a, Zoramcheuva (35), Pangkhua a thi. Pick-up ah hian a neitu leh a nupui bakah, Zoramcheuva leh a nupui leh an fanu hmeichhe naupang an chuang a; pick-up hi kawng lai taka a let a, an floor tile phurhin Zoramcheuva hi a delh a ni.

Pick-up chesual hmu hmasatute'n Zoramcheuva hi Hnahthial damdawi-in an panpui nghal a, mahse, chhan theih a ni tawh lo. Lirthei khalhtu nupui leh Zoramcheuva fanu an hliam a, ngaihtuahawm erawh an ni lo niin an sawi.

Inrinni zan dar 9:30 vel khan Lalvuana (59) h/o Rochhari, Thingsulthliah chu truck-in a su a, a hmunah ka chhawn lohin thi. Thu dawn danin, Lalvuana hi a fanu Zonuntluangi thlân a tlawh haw lam a ni a, a sutu nia rinhlelh truck khalhtu chu police-in thu zawhfiah atan an man. Lalvuana ruang hi damdawi-ina enfiah a nih hnuah nimin chhun dar 12 khan vui a ni.

Lalvuana'n thlân a tlawh - a fanu Zonun-tluangi (23) hi May 14, 2026 zana Chanmari, Aizawla scooty leh bike intàinaa bike dangin a chîl zui vanga thi a ni a; a thlanah hian a pa hi ni tin a kal ṭhin niin an sawi.