PHE Minister hoin bawlhhlawh khawn khawmna tur lirthei sem

Public Health Engineering (PHE) minister Prof. Lalnilawma chuan July 24, 2026 khan Swachh Bharat Mission (Grameen) hnuaia bawlhhlawh khawn khawmna tur lirthei (solid waste collection vehicle) semna a hmanpui a; faina kawngah Mizoten hmasawnna tur an la ngah thu a sawi.

Prof. Lalnilawma chuan, bawlhhlawh khawnna tur lirthei sem chu faina lama hmalakna pawimawh a nih thu a sawi a, "Mizote hi faina kawngah hmasawn viau tawh mah ila, zir tur kan la ngah hle. Kan thawmhnawte a fai a, a langah chuan kan changkangin kan fai viau tawh a, a lang lo lamah kan la fai tawk lo. A langa kan fai ang hian a lang lo lam, kan chhehvelte pawh fai se chuan kan lui tui nú pawh a zia ang a, lui dunga plastic bottle leh polythene tam lutuk pawh a ziaawm deuh ang," a ti.

Sorkarin faina lam hawi ruhrel a bunte chu mipui ta a nih thu sawiin PHE Minister chuan, "A enkawl zui hna pawh khawtlangin an mawhphurhnaa an lak a ngai. Hengte hi a hlawhtlin theih nan mawhphurhna tam zawk hi Village Water & Sanitation Committee (VWSC) te kutah a awm dawn," a ti a; bawlhhlawh phurhna lirtheite chu a thlawna pek a ni a, ṭangkai taka hmanga enkawl turin a chah.

SBM(G) hnuaia bawlhhlawh sawngbawlna kalpui mekah Aibawk Plastic Waste Manage-ment Unit (PWMU), Seling PWMU, Serchhip SWMC leh Kawlkulh PWMU te hnenah bawlhhlawh khawnna lirthei pek pasarih pek a ni a; PWMU leh SWMC te hian RD block eng emaw zat a huam. PWMU-in a huam khuate zinga bawlhhlawh thliar ṭha leh user fee pe ṭha khua 25-a dah turin vantlang bawlhhlawh báwm 688 sem a ni bawk.

SBM(G) Mizoram hnuaiah hian hmun pangaah bawlhhlawh sawngbawlna kalpui mek a ni a, chu'ngte chu Aibawk PWMU, Seling PWMU, Serchhip SWMC, Kawlkulh PWMU leh Thaizawl PWMU te a ni. Heng sawngbawlna hmun hian khua 87 a huam mek a, khaw tam zawk huam tura hmalak mek a ni.

Bawlhhlawh sawngbawlna hmunte hi private operator-te leh VWSC-te enkawlna hnuaiah mipui aṭanga bawlhhlawh paih man (user fee) tling khawm hmanga enkawl a ni a; mipui aṭanga bawlhhlawh paih man duh anga hmuh ṭhat a nih ṭhin loh vangin bawlhhlawh sawngbawlna hmunah harsatna a awm ṭhin tih tarlan a ni.