Adhoc aided high school-a thawkte'n Sorkar kar nan mass casual leave an la

Mizoram Govt. Adhoc-Aided High School Teacher’s Association (MIGAHTA) chuan nimin khan adhoc aided high school-te sorkara dah (provincialise) tura Mizoram sorkar kar nan a huhoin chawlh an la. Mass casual leave hi vawiinah an la leh dawn.

MIGAHTA chuan thuchhuah siamin, nimin khan Mizorama adhoc aided H/S 90 chuanga thawkte'n mass casual leave an lak thu an tarlang a, "Adhoc H/S zawng zawng khar vek a ni a, naktuk (July 28)-ah pawh chhunzawm leh a ni ang," an ti.

Mass casual leave an lak avangin zirlaite leh mipui hriatthiamna an dil rualin, thláwp turin MIGAHTA chuan an ngen a, "Adhoc H/S-te hi kum 30 kal taa khawtlangin harsatna tam tak kara an lo din, lumpsum aṭanga provincialise pawh ni vek tawh, chumi hnua holam taka provincialise aṭanga paih thlak lehte kan ni," an ti a; The Mizoram Education (Lumpsum Grants-in-Aid for General Maintenance of Private School) Rules 2026 chu an pawm theih loh thu an tarlang.

MIGAHTA chuan, provincialise an nihna paihthlakah duh tâwk mai loa sorkarin tuna an dinhmun aia hniam zawk lumpsum grant-in-aid dinhmuna dah a tum chu an dodal tih an sawi a, "Kan sorkar chak tak hian kan dinhmunte min hrethiam tur leh kan zavaia min provincialise leh vek turin khawngaihna kan dilin kan ngen a, kan hmalaknate hi khawtlang sikul dinhmun tlahniam tur venna leh ṭhangthar hna zawng mekte hmakhua a ni tih min hriatsak turin mipui kan ngen," an ti.

Sorkara an phûtte a hlawhtlin loh chuan MIGAHTA hian July 29-30, 2026 khian Aizawlah sit-in demonstration an huaihawt leh dawn a ni.