FASPHI-ah kum 2026-27 atan Mizoramin cheng vbc 120 kan dawng dawn - CM Duha

Chief minister Lalduh-oma chuan nimin khan Zoram Medical College & Hospital (ZMCH) a tlawh. Hna thawh ṭhat vanga Mizoram sorkarin lawmman (incentive) a dawng ṭhin chu lawmawm a tih thu sawiin CM chuan, "Hmalakna tur dik taka kut kan thlak ṭhinzia tilangtu a ni," a ti.

Lalduhoma chuan, 16th Finance Commission hun chhungin sorkar laipuiin Financial Assistance to States/UTs for Public Health Infrastructure (FASPHI) a kalpui dawn tih a sawi a, "Kum 2026-27 atan cheng vbc 4,200 a dah hrang a, Mizoram chuan cheng vbc 120 kan chang ve dawn," a ti a; Health Minister leh Health department-a thawktute chungah a lawm thu a sawi.

Ministry of Health & Family Welfare (MoHFW) aṭangin Mizoramin sum a dawn zat tur an rawn hrilh tawh tih sawiin CM chuan, "Kan claim tur zat hi min rawn hrilh tawh a, cheng vbc 120 hû project proposal thehluh tawh niin, MoHFW-in min pawmsak tawh. MoHFW hian July thla ral hmain proposal-te hi Ministry of Finance-ah a thehlut dawn," a ti.

Tarlan danin, FASPHI-ah hian tehfung pali - infant mortality rate (IMR), maternal mortality ratio (MMR) leh tuberculosis mortality rate (TB-MR) dihmun leh, National Quality Assurance Standards (NQAS) hmuh zat hmangin state hrang hrangte'n lawmman an dawn tur zat chhût a ni.

Mizoramin lawmman a dawnnate chu – IMR (2023)-ah IMR 13 (nau piang 1,000 zela 13 an thi) a nih laiin, kum 2024-ah 12-ah a tlahniam a, incentive cheng vbc 20 dawn a ni. NQAS hmu sorkar damdawi-inte chu kum 2024-25 aṭanga 2025-26 chhungin 21.07%-in an pung a, lawmman cheng vbc 100 hmuh a ni bawk.

ZMCH-ah hian MSSB zirlai 494 leh MBBS zo tawh, internship ti lai 97 an awm mek a; kum 2025-26 academic year bikah MBBS zirlai 100 an awm. National Medical Commission chuan post graduate zirna seat 10 hawn phalna a pe a, kum 2024 khan Master of Public Health zirna hawn niin, zirlai pariat an awm mek a ni.