DMR Minister-in project thehluh tawhte sorkar laipuiah a bawhzui

Disaster Management & Rehabili-tation (DMR) minister Prof. Lalnilawma chuan nimin khan disaster management chungchanga Mizoram mamawh hrang hrang project sorkar laipuia an thehluh tawhte Delhi-ah a bawhzui a, hmalakna thar tur ruahmante a thlen nghal.

Prof. Lalnilawma chuan African Swine Fever (ASF) vanga Mizorama vawk vulhtute harsatna a thlen. ASF hi State Disaster Management Authority chuan notified disaster atan a pawm tawh a, State Disaster Relief Fund hnuaia notified disaster-ah puan ni se, tiin National Disaster Management Authority-ah rawtna thehluh a ni tawh.

ASF avangin vawk vulhtute'n cheng vbc 485.37 an hloh nia chhût a ni a, zangnadawmna tam zawk an dawn theih nan DMR Minister hian sorkar laipuia thuneitute a dawr a ni.

Ruahmanna thehluh tawh dang DMR Minister-in a ûm zuite chu - Lawngtlai Bazar Veng leh Chandmary-a leimin vanga chhiatna thlenga ṭanpuina Central Special Assistance cheng vbc 21 dilna te, district panga - Aizawl, Lunglei, Serchhip, Champhai leh Siaha district tan National Earthquake Risk Mitigation Programme phase-I ah cheng vbc 95.76 dilna te, National Landslide Risk Mitigation Programme phase-I hnuaia Ngaizel, Serchhip, Champhai leh Siahaa leimin chungchangah cheng vbc 50 final project proposal report te a ni.

Prof. Lalnilawma chuan Ministry of Home Affairs-ah Post Disaster Needs Assessment Report 2021-2025 a thehlut nghal. Report-ah hian kum 2021-2025 chhunga Mizorama chhiatna hrang hrang - Cyclone Remal, ruahsur nasa vanga tuilian leh leimin, mau tám vanga sazu puangin buh leh bâl nasa taka a tihchhiat leh, ASF vanga harsatnain mi tam tak eizawnna a tihchhiat dan leh, inkalpawhna kawngpui eng emaw zat siamṭhat ngaite tarlan a ni.

Chhiatna thleng hi cheng vbc 644.71 hû vela chhût a ni a; economic loss belhkhawm chu cheng vbc 645.49 vel a tling. A pumpuia zangnadawmna leh siamṭhat hna thawh nan cheng vbc 873.22 mamawh a nih thu tarlan a ni.