KHAWTHLIR

A thlâwna inentirna

Prison Ministry India, Mizoram Unit leh Aizawl Diocese Health Commission te chuan July 25, Inrinni khan Central Prison & Correctional Home (Central Jail ṭhin)-ah a thlawna inentirna an buatsaih. Doctor pariat leh anmahni puitute'n jail-a tángte hriselna dinhmun enfiahin, táng mi 500 vel an inentir a, an mamawh ang damdawite a thlawnin an pe nghal. July 18, 2026 khan Central Women Jail-ah free clinic an lo buatsaih tawh bawk.

END-in meth man

Excise & Narcotics department chuan July 16, Pathianni zan khan New Champhai Phaizawlah methamphetamine kg 3.333 (mûm 30,300) an man a, a neitua puh Vanthangliana (40) s/o Ngurdawla leh Thanghomanga (35) s/o Kaikhanlanga, New Champhaia khawsa nia inchhalte an man bawk.

DC-in lirthei hlan

Aizawl bawrhsap Lalhriatpuia chuan nimin khan DC Pisapui kawtah Seling Plastic Waste Management Unit enkawltu Vanzel EcoSolution leh Aibawk Plastic Waste Management Unit enkawltu Waste Tech & Bio-Energy hnenah bawlhhlawh ṭawih thei lo khawn khawmna tur lirthei (dry-waste collection vehicle) pahnih ve ve a hlan. Lirthei hi Aizawl District Water & Sanitation Mission-in State Water & Sanitation Mission aṭanga an dawn a ni.

My Bharat ngaihtuah

Kolasib leh Lawngtlaiah nimin khan bawrhsapte kaihhruaiin 'My Bharat District Advisory Committee' an ṭhukhawm a, hmalak dan tur an rêl. Mera Yuva Bharat hi sorkar laipuiin India rama kum 15-29 inkar tana a buatsaih a ni a, ṭhalaite thiamna tihhmasawnna tur leh hma lam huna ram hruaitu ṭha an nih theih nana kahhruaina tur ruahmanna a ni a; he platform kaltlang hian ṭhalaiten an theihnate phochhuakin, thiamthil thar an zir theih bakah, sorkar hmalakna hrang hrangah a taka tel ve theihna an nei thei dawn a ni.

Heroin man

Assam Rifles leh Excise & Narcotics department ṭang dun chuan July 26, Pathiani khan Siasi, Siaha district-ah Myanmar mi pahnih hnen aṭangin heroin gram 401 an man.