SIR 2026 kal mek chungchangah CYMA hruaitute'n Mamit an tlawh

Electoral Roll Special Intensive Revision (SIR) 2026 chungchangah Central YMA hruaitute chuan nimin khan Mamit an tlawh a, Mamit DC conference hall-ah Mamit Election officer Lalnunfela Chawngthu kaihhruaiin SIR 2026 Draft Electoral Roll chungchang an sawiho.

Ṭhutkhawmah hian Mamit district-a electoral registration officer (ERO) pathum - Lalchhan-hima (Hachhek, N Lalzarzova (Dampa) leh Carolyn LB Khiangte (Mamit)-te an tel a; CYMA aṭangin general secretary Prof. Malsawmliana leh treasurer H Duhkima bakah, CEC member 11 an tel. YMA Mamit Sub-Hqrs, Chhawrpial Group, Airport Group, Langkaih Group leh Taitesena Group hruaitute an tel bawk.

CYMA General Secretary chuan, SIR 2026 Draft Roll chu ngaihṭhatthlak loh an tih thu sawiin, "Roll--ah hian khua leh tui dik tak thun tur a nih rualin, foreigner lut turte engtin nge kan dan theih ang tih ngaihtuah a ngai a, hearing neih turah hnam rilru pua kan thawhho a ngai," a ti a; ERO leh AERO te chu dik taka ding ngam tur leh, mi dik lote thun an nih loh nan huaisen taka ṭang ngam turin a ngen.

YMA group hruaitute chuan, YMA awm lohna khua eng emaw zata mihring pun chak dan chu ngaihṭhatthlak loh an tih thu an sawi a; Election official lam chuan YMA awm lohna khuaa hearing neih hunah YMA group hruaitute an hriattir tur thu an sawi a ni.

Dampa bial ERO N Lalzarvova chuan, fimkhur thei ang bera kal an tum thu a sawi a; Hachhek ERO Lalchhanhima chuan, Chief Electoral Officer aṭangin YMA leh NGO ngaih pawimawhte ngai pawimawh tura ngenna an dawn thu leh, booth level officer fel lote an thlak thu a sawi bawk.