Tribal Pride Gardens siam dan tur EFCC Minister-in a enfiah

Environment, Forest and Climate Change minister Lalthansanga chuan nimin khan Tribal Research Institute & Ropuiliani Freedom Fighters Museum, Kelsiha Tribal Pride Gardens siam dan tur a en a; hmunhma tihchangtlun zel dan tur department hotute nen an sawiho.

Minister Lalthansanga hi EFCC Secretary, Art & Culture Secretary, Horticulture Secretary, Principal Chief Conservator of Forest leh department pathuma officer dangte bakah, Kelsih Village Council member-te'n an ṭawiawm a ni.

Sorkar laipuiin Birsa Munda pian champha November 25, 'Janjatiya Gaurav Divas' atana a puan pualin India ramah 'Birsa Munda Janjatiya Gaurav Upvan' din tura ruahman a ni a; hei hi Mizoram sorkar pawhin bawhzuiin Tribal Research Institute & Ropuiliani Freedom Fighters Museum, Kelsihah Tribal Pride Gardens siam tura hmalak mek a ni.

Tribal Pride Gardens hi Art & Culture department bultumin Horticulture department leh EFCC department ten an siam dawn a ni.