Delhi-ah DMR Minister leh UNDRR hotuin thawhhona ṭha neih dan tur an sawi dun
Disaster Management & Rehabilitation (DMR) minister Prof. Lalnilawma chuan July 28, Thawhṭanni khan United Nations Secretary-General (SRSG) for Disaster Risk Reduction (UNDRR) special representative Kamal Kishore chu Mizoram House, Delhi-ah a kâwm a, technical thila thawhhona ṭha zawk neih theih dan tur an sawi dun.
DMR Minister chuan, khuarel chhiatna hrang hrang - lirnghing, leimin, lung tla bakah, sik leh sa inthlak danglamin a nghawng chhiatna dangte laka Mizoramin harsatna a tawh theih dante a hrilh a ni.
Prof. Lalnilawma chuan, chhiatna lo thleng thut thei laka Mizoram mipui an inven theih nan khawpui ruahmanna ṭha zawk siam leh tunlai thiamna hmanga in sak dan tur kaihhruaina ṭha zawk siam chungchanga Mizoram hmalakna a sawi a; Aizawl khawpui tâwt lutuk chungchang leh Thenzawl Peace City atana ruahmanna siamte a hrilhfiah.
Leimin nasa laka invenna atan National Disaster Management Authority (NDMA) nen thawkhoa Mizoram sorkarin project a siam te, chhiatna a thlen hmaa rang zawka rálkhèl dár tihrîk dan tur te, in sak dan him leh ṭha zawk te, mipui inrálrin dan tur zirtirna te pawh sawi lan a ni. Chhiatna laka Mizoram mipui himna tura tunlai thiamnaa Mizoramin ṭanpui a ngaih dan Minister chuan a sawi.
Kamal Kishore chuan, UNDRR-in thiamna lama ṭanpui turte leh ram dang mithiam bikte nena Mizoram thlun zawm dan tur chungchangah an inhawn thu a sawi a; DMR Minister nen hian Mizoramin North-East Regional Disaster Management Conclave a thlen tur chungchang an sawi dun bawk.
Sik leh sa danglam zelah khuarel chhiatna nasa zawk thleng thei laka inven dan tur leh inbuatsaih lâwk dan tur te, chhiatna nasa zawk a thlen lohna tura Sendai Framework for Disaster Risk Reduction inkaihhruaina zawm leh thlawp chungchangte pawh Prof. Lalnilawma leh Kamal Kishore hian an sawi a ni.
DMR Minister hi adviser to Govt of Mizoram Renu Sharma, Delhi Mizoram House resident commissioner Shweta Chauhan, DMR secretary Suhsil Singh leh Mizoram House additional RC Alexander V Chongthu ten an ṭawiawm a ni.