Khawzawlah naupang kumtlinglo chhawr an awm leh awm loh enfiah

Khawzawl District Task Force on Child Labour member-te chuan nimin khan Khawzawla restaurant, workshop leh hmun dangte an tlawh a, naupang kumtlinglo chhawr an awm leh awm loh an enfiah.

Hna thawhna hmuna naupang chhawr an awm leh awm loh endik hi National Commission for Protection of Child Rights huaihawt Pan-India Rescue Rehabilitation 4.0 neih mek puala tih a ni a; dawr neitute hnenah India Danpuiin naupang kumtlinglo hna thawka chhawr a khap dan an hrilhfiah nghal.

Task Force member-te chu hlawm thumah an inthen a; Tuisenphai, Dulte, Puilo, Kàwnzàr, Lungvár, Champhai kawng, Zuchhip, Zaingèn, Hlunbuang, Hermon, Vengthar leh Dinthar venga dawr, workshop, quarry, hotel leh restaurant-te an endik a ni.

Kumtlinglo naupangte hna thawka chhawr chungchangah Khawzawl Bawrhsap chuan hriattirna chhuahin, Child and Adolescent Labour (Prohibition and Regulation) Act, 1986--in kum 14 hnuai lam an zirna tibahlah thei khawpa hna thawka chhawr a khap thu a lo puang tawh. Naupang zirna tibahlah lo zawnga hna him china chhungte puih bakah, entertainment industry-a tel erawh chu phal a nih thu a tarlang.

Dan kalha naupang chhawrtute chu Rs 50,000 thleng chawitir leh kum 2 thleng táng tura hrem theih an ni.