Aizawl West College-in Freshers' Social hmang

Aizawl West College chuan nimin khan Vanapa Hall-ah Freshers' Social an hmang a, adviser to chief minister TBC Lalvenchhunga, MLA-in hmanpuiin, H Vanlalkeuva Award leh Best Library User Award dawngtute hnenah a hlan bakah, college annual magazine a tlangzarh.

TBC Lalvenchhunga chuan, Aizawl West College campus thar dinna atan SASCI aṭangin cheng vbc 30.40 dah a nih thu sawiin, "Hna hi kalpui mek a ni," a ti a; zirna ṭha chu 'all-round development' a nih thu sawiin, Mizoram sorkarin zirna tihhmasawnna kawngah hma a laknate a tarlang.

Adviser to CM chuan, ṭhangtharte chu kawng tinrenga hmasawn ngai tak an nih thu leh kutkawih eizawnna lamah kal nasat a ṭul thu a sawi a, "Inelna a sang tawh em em a, mahni kea ding thei ni tura kan inbuatsaih zel a ngai. Artificial intelligence hi hman thiam a pawimawh rualin, keimahni theihna tihpun tum lo a, AI rinchhan ringawta thil kan zir a hlauhawm a, keimahnia awm kan theihnate tichak tura lehkha kan zir a ṭul a ni," a ti.