Kawng siam thuai turin sorkar ngen

Mizoram Tipper Association Joint Committee chuan thuchhuah siamin, Mamit leh Kolasib district-a Mizoram mamawh lak luhna kawngpui chhia chu August 10, 2026 hmaa siamṭha turin Mizoram sorkar leh NHIDCL an ngen.

Mizoram Tipper Association (MTA) Gen. Hqrs, Aizawl, All Mizoram Commercial Tipper Association (AMCTA) leh MTA Dist. Hqrs, Kolasib te intelkhawmna Mizoram Tipper Association Joint Committee chuan, Mamit leh Kolasib district chhunga Mizoramin a mamawh tam zawk phurh luhna leh phurh chhuahna kawngpuite chu a chhe hle tih an tarlang a, "Kawng hi chak taka thawm ṭha turin Mizoram sorkar leh NHIDCL kan ngen a, August 10, 2026 hmaa kan duh anga tlan nuam tawk taka siam a nih loh chuan kan thiam dan leh kan rem hriat dan angin hma kan la dawn," an ti.

Assam aṭanga Mizorama balu phurh luh chu a him tawk lo nia an hriat thu tarlangin Joint Committee chuan, "Mizo motor-te enhran kan nih em avang leh kan naute motor pali an man vanga lungawi lohna lantir nan tiam chin awm loa kan ṭhenawm state balu-te phurh luh tawh rih loh kan rel a, phur lut lui kan awm a nih chuan an chungah engpawh thleng se, a mawh kan phur lo ang," an ti. State pawn mite chu Mizorama balu, ṭiau, lung leh a dangte chuhpui lo turin an ngen a, phur lui an awm chuan an chungah engpawh thleng sela an sawibuai theih loh thu an tarlang bawk.