Registered engineer tan training buatsaih

Disaster Management & Rehabi-litation (DMR) department, Aizawl Municipal Corporation (AMC) leh National Institute Technology (NIT), Mizoram chuan nimin khan Assembly Annexe conference hall-ah AMC hnuaia registered engineer-te tan ni hnih awh tur 'Training on Safe Building Construction Practices' an buatsaih a, Aizawl mayor H Lalremtluanga'n a hmanpui.

Aizawl Mayor chuan, Mizoram chu Seismic Zone V-a awm a nih thu sawiin, "Engtik hunah pawh lirnghing na takin min nuai thei reng a, inbuatsaihna ṭha neih a ngai," a ti a; engineer-te chu in sak phalna dilna bakah, ban phun hnuah pawh site plan leh building permit mila in sak leh sak loh enpui zel turin a chah.

Tuichhe paih danah fimkhur a ṭul thu sawiin H Lalremtluanga chuan, "Tuihâwk luankawrte pawh building permission-a kan dilpui angin an siam tak tak em tih en zui a, kaihruaitu kan nih a ngai. Chhiatna hi kan dang thei lo a, a tawrhna erawh kan tiziaawm thei. In sakah himna ngaih pawimawh a ṭul," a ti.

Training-ah hian Aizawla in sakte a him zawk dan tur te, AMC Building Regulations chungchang te, Side Development and Slope Modification Regulation leh in chak lo thawm ṭhat dan turte zirho a ni a; DMR department, AMC Civil Engineering department, Mizoram University leh PWD mithiamte'n engineer-te chu an zirtir dawn a ni.