KHAWTHLIR

KṬP-in thisen pe

KṬP, Bethlehem Venglai Branch chuan nimin khan an hmunah thisen pek huaihawtin, Synod Hospital Blood Centre tan thisen unit 37 an pe a, petute mipa 33 leh hmeichhia pali an ni.

Ṭhalai 15 thlang

Higher & Technical Education Minister leh HTE department hmalakna kaltlangin Mizo ṭhalai 15 chu Shankar IAS Academy-a a thlawna coaching kal tura thlan an ni. Coaching kal tura thlante hi nimin khan HTE director Lalṭanpuia hoin a pisaah thil pawimawhte sawipui an ni a, Mizoram sorkar leh Shankar IAS Academy thawhhona tura hma latu Aizawl North SDPO Arun Balgotra pawh a tel. Free online IAS coaching hi kum hnih chhung kalpui tur a ni.

Kawng thawm ṭha

Diblibagh leh Tlabung inkar kawng chu lirtheiin an zawh hleih theih loh khawpa a chhiat tawh avangin nimin khan Diblibagh VC leh Young Chakma Association ten hnatlangin an thawm ṭha. Kawng thawm ṭhatna leh hnatlang atan hian khaw mipuite'n an remchan ang sum an thawh khawm a; kawng khuar thûk zual laite chu lirthei tan zawh a nawm zawk nan lungin an hnawh a ni.

MPYCC ṭhukhawm

Mizoram Pradesh Youth Congress Committee hruaitu general secretary-te chu nimin khan an pisaah an ṭhukhawm a, MPYCC president Ngurdingpuia Pachuau leh office bearer dangte'n an hmanpui. Ngurdingpuia Pachuau chuan, Congress ṭhalaite'n Mizoram tan nasa lehzualin hma an la ṭan leh tawh dawn tih a sawi a, "Pu Lal Thanzara president kan nei, ama hoin Congress chuan Mizoram tan a ṭha zawngin danglamna mellung kan phun dawn a ni," a ti.

SABB campaign

Hnahthiala UDPA department leh KṬP, Hnahthial South Branch chuan nimin zing khan Safai Apna Bimaari Bhagao (SABB) Campaign hun an hmang a, Hnahthial DUDO Christina Lalnunfeli'n a kaihruai. Nauhruai kâwna vantlang zun-in leh a chhehvel tifaiin an hnatlang a, mi eng emaw zat an thawk chhuak a ni.