MIGAHTA-in lungawi lohna an lantir; Sorkar order pahnih leh rules pakhat an hâl

Mizoram Govt. Adhoc-Aided High School Teachers’ Association (MIGAHTA) chuan an thil phût tihhlawhtling tura sorkar kar nan lungawi lohna an lantir zui zel a; nimin khan Vanapa Hall kawtah sit-in demonstration an huaihawt a, sorkar order pahnih leh rules pakhat an hâl.

Vanapa Hall kawta punkhawmah hian sorkarin adhoc high school-te a provincialise tawhna a hnuh kîrna (revoke) order te, tun hnaia sikul ṭhenkhat a provinvincialise-na order leh, sorkarin lumpsum grand-in-aid-a dah a tumna rules te an hâl a ni.

Provincialise-a dah an phût thu te, school provincialisation kalpui danah power to relax rualkhai taka hman an duh thu te, an sikul dinhmun lumpsum grand-in-aid-a tlakhniam an duh loh thutein an au rual a, thuziak chi hrang hrang an keng bawk.

MIGAHTA president F Vanlalchuanga chuan, tun hma zawngin sorkarin school provincialisation a kalpui danah thingtlang leh khawpui sikulte enrollment hmangin khirh takin a teh ngai lo niin a sawi a, "Khawtlangin an mamawh avang zawkin a provinvincialised mai ṭhin. Vawiin hian khawtlang sikul dinhmun humhim tur leh ṭhangthar lehkhathiam hna zawng mek leh zirlaite tana pên chhuak kan ni," a ti.

MIGAHTA tarlan danin, adhoc high school-te chu adhoc status-a kum 15 an awm hnuah, kum 2023-a provincialise vek an ni a, thla 9 hnua revoke leh an ni a; revoke an nih hnuah provincialise leh vek an nih tur thu Education Minister ṭawngka vawi tam tak an dawng. Revoke an nih aṭanga kum 2 a liam tihah kum 20 kal taa an awm tawhna, tuna an dinhmun aia hniam lumpsum grant-in-aid dinhmunah dah an ni.

Sikul dinhmun tihhniam a nih avang hian tuna thawk mekte an pension (chawlh) hunah an aiawh tur zirtirtute chu hlawh tlemtê hmanga lak an ni tawh dawn nia sawiin, "Hei zirtirtu dinhmun dah hniamna a ni," an ti a; ṭhalai hna zawng mekte beidawnna siamtu a nih vangin an duh lo a, an dodal zel dawn thu an tarlang.

MIGAHTA chuan, sorkara an phût a hlawhtlin theih nana lungawi lohna an lantir avangin khaw hrang hrang 90 chuanga high school-ah zirna a khaihlak tih an sawi a, "Pawi kan ti tak zet. Amaherawhchu, heng kan hmalaknate hi khawtlang sikul dinhmun tlahniam tur venna leh ṭhangthar hna zawng mekte hmakhua a ni tih min hriat sak turin kan ngen a ni," an ti.