Central YMA-in ruihhlo an tichhia

Central YMA hnuaia ruihhlo dotu - Central Anti Drugs Squad (CADS) batch hnihna leh Zone Anti Drugs Squad (ZADS) ten ruihhlo mante chu nimin khan CYMA Hall-ah tihchhiat a ni a; CADS batch thumnaa member tharte lawm luhna hun hman nghal a ni.

CADS batch hnihna hun chhung, April 22 - July 28, 2026 chhungin CADS leh ZADS (Zone I-X) ten ruihhlo tam tham tak an man a, chungte chu nimin khan tihchhiat a ni. CADS batch hnihna hun chhungin ruihhlo kaihhnawihah mi eng emaw zat man an ni a; man zinga mi 19 chu rehabilitation home/centre-ah dah an ni a, mi 53 chu Excise & Narcotics depatrment hnenah hlan niin, mi 386 chu counselling neihpui an ni.

Inkhawm hi CYMA treasurer H Duhkima'n a kaihruai a, CADS 2nd Batch secretary Darremsanga'n an hmalakna chanchin a sawi. CYMA vice president Prof. Lalnuntluanga'n CADS batch 3-naa member tharte fuihna hun a hmang a ni.

CADS 3rd Batch-ah hian CYMA finance secretary MS Ralte chu convener a ni a, Central Executive Committee (CEC) member Lalbiakkunga leh John Kima te chu assistant convener an ni. CEC member Israela chu secretary a ni a, CEC member Lalbuatsaiha chu assistant secretary a ni a; member dang 24 an awm.